Faina atan thawk dun dawn

UD&PA dept hnuaia Swachh Bharat Mission (Urban) 2.0 leh Save the Riparian chuan kumin July atanga 2025 July thleng atan faina leh thianghlimna kawnga Mizoram khawpuiten hma a sawn theihna turin thawhhona thuthlung an ziak.
He thawhhona hian kum khat chhunga faina leh thianghlimna bakah bawlhhlawh sawngbawl kawnga mipui zirtir, lui leh luidung, thing leh mau humhalh bakah thingphun, hmankhat daih plastic tihrem kawnga hmalakte a huam a. Thawhhona thuthlungah hian UD&PA director Dr Andrew H Vanlaldika leh Save the Riparian president Ngurthanzaua Sailo ten hming an ziah hnan a ni.
Save the Riparian hian kumin March atang khan ni 50 chhung Aizawl khawpui chhungah luikawr thenfai hna an thawk tawh a. An hmalakna tawiawm hian pawl leh mipui tam tak bakah ram hruaitute pawh an lo thawkchhuak tawh a ni. Kumin chhung hian UD&PA nen tangdunin District Headquarters tinah awareness campaign neih tum a ni bawk.