Faina hnatlang hi a tha, mahse…

Sawrkar laipuiin faina chungchang inzirtirna a kalpui mek Swachhata Pakhwada denchhenin tun hnai khan Mizoram Rural Bank thawktute chuan World Bank Road-ah faina hnatlang an nei a. MRB hian Save the Riparians te nena thawkhovin World Bank Road-ah bawlhhlawh thianfaiin an lo hnatlang tawh bawk.
Mizote hi, hnam dangin an neih ve lem loh, hnatlanga thawk dual dual thei hnam kan ni a tih theih awm e. Hnatlangah rau rau pawh, ‘faina hnatlang’ hi hnatlang kan neih tam pawl a ni ngei ang. Kan balin, kan tawpin kan bawlhhlawh hle tihna a ni ber ang chu.
Faina hnatlang neih hi a tha, mahse ‘faina hnatlang’ neih tlut tlut reng ringawt hi faina a ni lo tih chu a hranpaa finfiah lehchuan a tul reng reng lo. Bawlhhlawh thianfaia kan hnatlang reng a nih chuan, kan bal reng, kan tawp reng, kan bawlhhlawh reng, tihna a ni mai a. Hnatlang hi faina ‘solution’ a ni lo tawp tihna a ni.
Chuti a nih chuan ‘hnatlang lo tawp ila a ni mai alawm’ ti ringawt ta ila, a fuh ber dawn chuang lo. Faina hnatlang neih pah hian, hnatlang kan sawtpui a, kan lo fai zual zel a, a tawpa hnatlang ngai lo tura kan fai theihna tur lam hawia hmalak hi a tel tur a ni a. |awngkam tha leh thuziak tha pui pui ringawt hian min tifai zo tawh lo tih chu a lang chiang reng tawh a, heng aia sawt deuh zawk turin, a sap tawng takin, ‘effective solution’ tur hi kan zeh tel zel a pawimawh tawh a, khawtlangin emaw, pawlin emaw, sawrkar thuneihna nena inhne rem tura tha kan thawh a, kan hahpui ve deuh hi chu a tul tawh a ni.
Zuk leh hmuam khapna dan (COTPA) dungzuia hmalakna kha kan hre theuh ang a, a tir lamah chuan a sak ve talh a nih kha. Mahse, khauh deuh zawkin dan kenkawh a han ni chho a, tunah chuan puipunnaa meizial zu hmuh tur an awm ta lo.
Bawlhhlawh thehthang chungchangah pawh hian, khauh deuh zawka dan kenkawh a, tawngkam chauh lo deuh pawh kan rawih mai hi, kan that tlanna tur a ni tawh awm asin.