Faina hnatlang hi bansan ta ila…

Kar kalta Zirtawpnia UD&PA Department huaihawt ‘Aizawl Faina Hmathlir’ hmanpuitu UD&PA minister K. Sapdanga chuan, ‘ram changkang leh fai kan tihte hi, dan leh hrai lekkawhna kawngah an lo kal nâ em em a ni’ tiin a sawi a. Kan kawtthler, in leh a bul vel, tui luankawr etc. leh boruakte hi ‘khauh zawkin Law and Order hmangin kan ti fai tawh dawn a ni’ tiin a sawi bawk a.
Mizote hi pi leh puta ata tawh, hnatlang hnam kan ni a, hnatlang ngai pawimawh em em hnam kan ni bawk. Mizote anga khawtlang huapa hnatlang dual dual thin hi hnam dang an lo awm ve a nih pawhin, keini ang em ema hnatlang uar hi chu an ni kher lovang.
Faina hnatlang phei hi chu kan ngai pawimawh lehzual a, chutih rualin faina hnatlang kan neih thin avanga fai tual tual erawh kan ni hauh si lo. Kan chenna bul leh khawlaiah bawlhhlawh kan thehdarh sauh sauh a, chumi thianfai tur chuan kan han hnatlang leh dual dual mai thin a ni a, ti tha hi kan inti em em mai zel lehnghal a, hnatlang ve lote hi chu pawisa chawitir tak kan nap mai thin a nih hi.
Hei leh chen hi kan lo hnatlang tawh a, kan bawlhhlawhin kan bal tual tual zawk emaw tih tur a ni a. Fai tual tual zawk tura “a tih dan dang ngaihtuah” lam hi kan tum lo niin a lang a, a tih dan kan hriat chhun ‘hnatlang’ hi a sawt (effective) lo tih pawh kan hrechiang tlang ang.
Ram changkang zawkte tih dan phung ‘khauh taka dan kenkawh’ kan sawi thin hi a taka kalpui ve rawih mai kan mamawh ve tawh a nih hi, tih ngaihtuahna a lo piang mek niin a lang a, kan ram hruaitute pawhin an sawi ri vuai vuai ta.
Hetiang a nih chuan, Aizawl municipal huam chinah hian, faina awareness campaign hi kalpui sauh sauh ila, vawikhat chu tihtakzetin hnatlang beihpui hi thlak zui ni ta bawk se, chumi hnuah chuan hnatlang hi bansan rih ila, thuneitu lamin bawlhhlawh thehthang kawnga dan bawhchhiate hremna dan khauh takin han lekkawh zui bawk se, a paihna hmun ni lova bawlhhlawh paihten pawisa an chawi zak zak zel chuan, kum khat hnuah chuan kan ziaawm phah ngeiin a rinawm a. Zawi zawiin state khawpui fai ber te pawh nih hun a la awm mahna le.