Faina kawnga thawkte tan a thlawna inentirna
Aizawla faina kawnga thawktu, khawlai hmun hnawk tifaitu leh bawlhhlawh paihna hmuna thawktute tan a thlawna inentirna buatsaih tum a ni.
Aizawl bawrhsap Er. Lalhriatpuia hoin Swachhata Hi Seva 2024 Campaign kalpui dan tur sawiin District Level Steering Committee chu Thawhtanni khan an thukhawm a. Khawpui chung leh thingtlanga sawrkar department, khawtlang leh tlawmngai pawl anga hmalakna tur hrang hrang inhrilhhriata kalpui dan tur sawi ho a ni.
Bawrhsap chuan faina leh thianghlimna kawnga kumtin hmalakna lo neih tawh thin dan sawiin, “Heng hmalakna hi kan tih tur atana tuk a nih avanga ti mai loin, faina hi kan nunphungah bet tlat tawh se ka duh a. Khawtlang faina leh thianghlimna hian kan bawlhhlawh paih dan, tuichhe paihna leh luankawr siam dan a huam tel a ni,” a ti.
Fur hunlaia chhiatna kan tawh tam tak chu kan tui paihna leh luankawr (drainage) fuh tawk lo vang a ni tih Er Lalhriatpuia hian sawiin, kan him tlan nan chuan drainage tha neih, kan in leh lo a him tawk em tih enfiaha report-na hmun tura report a tul tih a sawi.
Addl. DC Mark Lalthanliana chuan sawrkar laipuia Ministry of Housing and Urban Affairs-in faina campaign atana ruahmanna a siam bawhzuia district level-a hma lak tur a ni tih sawiin, hun kaltaa ODF leh ODF Plus hmalakna chu Mizoramah hlawhtling taka kalpui a nih tawh dan a sawi a. Tun tuma hmalakna tur pawh hlawhtling taka thawh zawh a nih ngei a beisei tih a sawi a ni.
Swachhata Hi Seva 2024 Campaign hi khawpuiah UD&PA-in kalpuiin thingtlangah PHED-in a kalpui dawn a ni.
Kumin campaign-ah hian ‘black spot’ an tih, cleanliness target units (CTUs) – hnawmhnawk inchhekkhawm, khawtlangin rei tak a lo ngaihthah tawh, environment leh mipui hriselna atan pawha pawi thei tur awm angte zawnchhuaha thenfai chu hna pui ber tur pakhat a ni a. Black spot tihfai nan hian faina hnatlang neih a, a hmunhma siam danglam (transform) in, hmun nuam leh tangkaiah a remchan dan anga siam chu hmalak dan tur pakhat a ni.
Zirlaite ah inhrilhhriatna hmanrua atan inelna hrang hrang buatsaih, mipui hnenah ziritrna pek bakah faina kawnga thawktu – LAD hnuaia sweeper, dumping ground-a bawlhhlawh sawngbawltute leh a dangte tan a thlawna health check up buatsaih pawh a tel a ni.