FAINA

Faina beihpui ‘Swachhata Hi Seva’ leh Faina Hapta 2024 kharna hun chu nimin khan Mizoramah hman a ni a. Hapta hman chhung hian kawng hrang hrangin faina lamah hma lak niin, faina hnatlang te neih a ni a. Faina hapta han hman hi chuan, chawlhkar khat chhung hi chu kan fai deuh vuk thin a, a lo rei deuh a, ngai kan awh leh vat thin.
‘Faina hapta’ hi kum tluana faina kalpui dan tur ruahmanna hunah hman ni thin se, hapta a zawh chiah atangin faina beihpui thlak chho ngar ngar thin ila, chutianga kum nga chhung kan kal theih chuan, faina hapta hi a hranpaa hman tluk tluk hi a tul tawh kher lovin a rinawm. Tuna kan kalphungah hi chuan, ‘chawlhkar khat chhung faina’ a ni deuh ber a, ‘kum khat chhung faina’ hi kalpui a hun ve tawh hle a ni.
India ramin zalenna kan neih theih nana bei ngar ngartu, India Hnam Pa tia hriat zui hlawh ta Mahatma Gandhi kha faina ngaipawimawhtu a ni a. |umkhat a thusawinaah phei chuan faina hi independence aiin a dah pawimawh zawk hial niin sawi a ni a. A kal velnaa a rilru tina thintu chu khawsak phung tawp lutuk kha a ni thin.
Mahatma Gandhi rilru hi hriain Prime Minister Modi pawhin an sawrkar tan kum 2014 atang khan faina beihpui ‘Swachh Bharat Abhiyan’ (Clean India Mission) kha a kalpui nghal a; faina ngaipawimawhtu Mahatma Gandhi pianchampha October 2 kher kha beihpui thlak tan ni atan a thlang nghe nghe a nih kha. Tunah hian a kum 10-na a tling ta chiah a, MK Gandhi pian champha vawi 155-na a ni bawk. Mahatma Gandhi kha sawrkar term khat chhung tal nungdamin la awm zui se, ‘Swachh Bharat Abhiyan’ hi a ngaih pawimawh hmasak ber tur a ni ngei ang.
Faina awmzia leh a thatzia hi thua sawichhuah lamah kan hausa a, a taka zawm lamah erawh kan pachhe leh viau mai. Hei hi thudik tak a ni a, kan hmuh tlan leh kan hriat tlan vek a nih hi. Hei hian a entir chu, rilru bawlhhlawh a tih theih ang. Rilru hi a hrisel a, a thianghlim a, a fai phawt chuan kan bulhnai leh chhehvel hi a fai ngei ngei thin. Rilru fai kan lo pu chiah lo a nih pawhin, khapna dan hmang talin a la fai theih a, chu pawh chu kan kalpui tha peih lo lehzel niawm tak a ni.
Khawvel huapa khawpui fai leh thianghlim tia hrat hlawhte hi, khapna dan an kenkawh that vang a ni deuh zel mai. Dan pawisakna hi kenkawh that leh that lohah a lo innghat thui hle a ni.