Fashion designer Giorgio Armani a thi

Fashion khawvela hming dai tawh lo tur, khawvela fashion designer hriathlawh ber te zinga mi, Italian fashion designer leh billionaire, Giorgi Armani, kum 91, thih thu Armani Group chuan thuchhuah siamin September ni 4 khan an puang.
Armani founder, Giorgi Armani hian a label hi 1975 khan dinin, a company hian fashion khawvel chu bung thar a kaipui a, fashion khawvela pa hausa ber pawl niin, a hausakna hi dollar tluklehdingawn 12 vel niin an chhut.
Giorgi Armani hi kuminah a taksa hriselna a tlakhniam deuh avangin a pawn chhuak tam ta lo deuh a, June thla a Milan fashion week-ah pawh a inlan lo a, a career-a a brand fashion show a tel loh vawi khatna a ni.
Armani hian khawvel sawi laih laih hlawh thei kutchhuak a nei nual tawh a, 1990 Golden Globes semnaa Hollywood actress Julia Roberts suit hak lian hnelh hnawlh tak bakah Jodie Foster leh Cate Blanchett ten an larpui tam tak te pawh a kutchhuak a ni a, Lady Gaga Monster Ball leh Born This Way tour costume te pawh a kutchhuak an ni.