FCAA adopt-na sut a ni dawn em?…
‘Dan Sakei’ tia sawi lo hlawh tawh FCAA 2023 kha sawrkar hmasain a dodal a, sawrkar tharin tun hnaiah a adopt leh a. Tunah All NGO leh political party thenkhat intelkhawm chuan FCAA 2023 adopt-na sut leh turin Mizoram sawrkar an phut leh mek a. Sawrkar hian a sut leh dawn em? tih chu zawhna lianpui a ni ta mek a ni.
Kan hriat angin FCAA hi March ni 29, 2023 khan Parliament-ah put luh a ni a. July ni 26, 2023-ah Lok Sabha-in a passed a, August ni 2, 2023-ah Rajya Sabha-in a passed ve thung a.
Khatih laia Mizoram sawrkar (MNF) khan, he dan sakei hi India Danpuiin Mizoram humhalhna dan (special provision) 371G a lo pek tawh chu rawn khawih pawi thei nia a hriat avangin rei rial lovin August ni 22, 2023-ah dodalna resolution a passed a. A hnu kum hnihnaah sawrkar thar (ZPM) chuan, ‘inhnial theih tak a ni’ …. ‘kan mithiamte pawh kan la ruai ang a’….. ‘a lo tha lo a nih chuan kan thu hi kan sut leh thei…’ ti chung zelin sawrkar hmasain a lo dodal tawhna chu paihthlain ‘adopt-na official resolution’ chu a rawn passed ve leh thung a.
Tichuan, Mizoram Legislative Assembly-in August ni 27, 2023-a resolution a passed hnu atang khan, chhum lo chat lovin platform hrang hrangah he dan sakei hi sawi zui a ni chho ta ngar ngar a. MNF party chuan September ni 3, 2025 khan Assembly Speaker hmuin, FCAA 2023 adopt-na resolution chu sut tura special assembly ko turin ngenna an thehlut a. A hnu lawkah Joint Civil Society of Mizoram huaihawtin all NGO leh political party thenkhat inhmukhawm chuan Assembly thutlukna sut leh turin sawrkar an ngen a, special assembly ko turin an phut ve bawk a; September ni 11, 2025-ah Vanapa hall tualah punkhawm huaihawt an tum nghe nghe.
Heti taka Mizo mipuite dodalna nasa tak tawk mek hi sawrkar hian engtin nge a kalpui dawn tak? tih chu mipui ngaihchan mek a ni a. He resolution passed a nih dawn a ‘inhnial theih tak a ni’ tih chu a thleng dik zui chu a ni ber a. Hriat chian vak loh, zirchian ngai tia sawi ni bawk si, Assembly meuhvin resolution a passed ta mai kha thil mak tak chu a ni phawt mai.
Eng pawh ni se, India Dan Puiin a bika humhalhna dan (special provision) min lo pek 371G kalh zawnga Dan dang siam a nih chuan, Dan ding sa humhalh tura tan lo khawh ve hi tih makmawh chu a ni e.