FCI-in OMSS-in buhfai hralh dawn Buk tling lo kan nei ve lo – FCI DM

Food Corporation of India chuan buhfai ‘stock’ a neih that deuh avangin Open Market Sale Scheme (OMSS) – D hmangin kar tin buhfai a zuar thin dawn a. A hlawma buhfai la duh, registration neite tan MJunction portal atangin e-auction hmanga lei theih a ni dawn.
FCI Aizawl divisional manager Zodinpuii Ralte chuan, kumin August 7 atangin online-in buhfai hi an zuarchhuak tan dawn a. Quintal khatah Rs.2800 niin, fortified rice a nih chuan Rs.73 belh tur a ni a, amaherawh chu FCI buhfai hi fortified rice vek a nih tawh avangin, Rs.73 hi belh tel nghal zel a ngai dawn tih a sawi a ni.
Mizoramah chuan FCI kudam – Aizawl (Tanhril), Kolasib leh Bairabi kudam atangin mahni remchanna ami ber a lei theih dawn a. MJunction portal-a in register tahw firm ten an dil thei anga, tlawmngai pawl emaw sumdawng emaw pawhin an dil thei a, an lei tur zat erawh a tlem berah metric ton khat a ngai thung dawn a. Lei duhtu, empanelled firm tan chiang zawka ngaihven theih a ni tih a sawi.
Zawhna chhangin FCI Aizawl hotu chuan FCI buhfai hi Bairabi Rel Station thlenpui a nih hnu ah weighbridge hmanga buk a ni a, an dahna hmun an thlenin buk leh vek niin, buk tling lo (shortage) a awm chuan a carrying contractor bill atangin paih sak a ni a; buk tling lo hi a awm ngai lo tluk a ni tih a sawi.
Tun dinhmunah Mizorama FCI kudam 5 awmah buhfai dah theih zat metric ton 31842 atangin MT 21566.699 a awm mek a. Wheat MT 925 an nei tel bawk.
Bairabi Rel Station atanga truck hmanga buhfai phurhchhuahnaah kawng chhe lai siamthat kawngah Supply minister-in chak taka a bawhzui sak zel avangin an lawm hle tih Zodinpuii Ralte hian a sawi a ni.