Feb. 13-ah US-ah Modi-a leh Trump-a inkawm dawn

Feb. 13-ah US-ah Modi-a leh Trump-a inkawm dawn
Prime Minister Narendra Modi-a leh US President Donald Trump chu February 13 hian Washington DC-ah an inkawm hmel niin hemi lam hre chiangtuten an sawi a, president hian prime minister hi zanriah a buatsaihsak dawn bawk.
Modi-a hian Washington DC hi February 12 tlaiah France atangin a thleng a, US khawpuiah hian February 14 thleng a cham ang a. American sumdawng hruaitute leh Indian-te a kawm bawk ang.
President a nih leh hnuah a vawi khat nan kar kal ta Thawhtanni khan an inbia a, hemi hnuah Trump-a chuan Modi-a hian February-ah White House a tlawh mai thei tih a lo sawi tawh.
Indian lam pawhin hruaitu pahnihte hian a hma lama inhmuh an tum tih sawiin Modi leh Trump-a te inkawmngeihna avangin thawhhona thuk zawk siama harsatna awm hrang hrangte pawh zau taka sawi dun tha an ti niin an sawi.
January 20-a Trump-a lak luhnaah khan External Affairs Minister S Jaishankar chu India aiawha telin Quad foreign ministers’ meeting-ah a tel nghal a. Hetah hian US sorkar thara hotu liante pawh hmu nghalin Trump-a pawhin India hi kumin kum tawpa Quad leaders’ summit-a tel paha tlawh a tum tih an lo hrilh.
India leh US hi ram inkawmngeih tak niin Trump-a hun hmasaah pawh khan Modi-a nen hian an inpawh hle a. A sorkar leh hnuah hian China lian mek zel doletna atan India kawmngeih lehzual hi tul niin a ngai nghal a ni.