Feb.2 ah sawhthing lei tan ang Organic bik lei chilh tum dawn

Mizoram sawrkar chuan kumthar February 2 atangin sawhthing a lei tan dawn a. Organic-a ching khua chu Collection Center kaltlang kher loa, an khuaa leisak dan dap a tum dawn.Mizoram Agricultural Marketing Board (MAMB) chu an chairman, chief minister Lalduhoma hoin Thawhtanni khan an thu a. Kum thar sawhthing lei tan ni atan February 2 an ruat. Hmunphiah chu February leh March chhunga lei tum a ni a, aieng leh Mizo hmarcha chu February atanga April thla chhung lei tum niin, buhhum erawh tun thla hian lei tan tawhin kum thar January thleng lei a ni dawn.
NITI Aayog-in Mizoram chu “Ginger Capital of India” ah a puang a. Hei hian Mizoram chu sawhthing quality tha neitu state a nihzia a tichiang hle tih MAMB hian sawiin, tunhnaiah Mizoram chu India rama sawhthing thar tam state zingah a inhlang chho mek bawk tih a sawi.
Hei vang hian MAMB chuan NITI Aayog chungah lawmthu a sawi rualin, sawhthing quality tha, chemical laka him ngei tharchhuak tura nasa zawka tan lak a rel.
Kumthar lama organic hmanga sawhthing ching thei tur khua chu MAMB hnena in-report turin an ngen a. Organic-a kalpui thei khua chu Collection Center kaltlang kher loa, an khuaa leisak dan dap tum a ni, tiin, kumina ching mek zingah pawh organic taka kalpui khua chuan MAMB hriattir nghal turin a chah.
Hmunphiah ro chu sawrkar rate-in ZOHANDCO in a lei leh dawn a, midang hnena sawrkar rate aia toa hralhna hre tan hralh theih reng a nih rualin, sawrkar rate aia tlawma hralhte hnenah support price pek an ni dawn lo tih MAMB hian a sawi lawk.
‘A chhan chu, ZOHANDCO in sawrkar rate-a a lei vek theih dawn vang a ni. Mimal leh sumdawng hmunphiah leitute chuan Land Resources, Soil & Water Conservation department hnenah certificate of origin lak tur a ni a, chumi hmang chuan EF& CC ah transit pass lak leh tur a ni,’ a ti.
8 State pawn atanga sawhthing slice dry lei duh an tam thin avangin Mizo innovator pahnih thilsiam, sawhthing channa leh ur rona khawl – Rapchung Technology leh Tapchhak Technology khawl chu Bana Kaih Scheme atangin MAMB-in lei a rel a, a enkawltu tur chu an hnathawh that dan azira ngaihtuah tum a ni.
8 MAMB rel danin, Secondary Collection Centre 65-in rualkhai taka a man (a rate) an kalpui theih dan ruahman tum a nih bakah SCC leh District Agriculture Marketing Committee hnenah an chetvelna sum mamawh zualpui pek an ni dawn a; buffer stock a awm tawh lo ang. Sawhthing society member-te ta chauh lei a ni anga, sawhthing society, cooperative society-a inziaklut tlakte chu inziaklut vek tura beisei an ni.