February-ah Road Safety Month 2025-ah lirtheia chesual 56 thi

Kumin February 2 atang hian Mizoramah Road Safety Month hman a ni dawn a, hemi chhung hian lirthei hmangtute tana fimkhur a tulna leh a kaihhnawih thil dang inzirtir a ni ang.
Mizoram State Road Safety Council chu Transport minister Vanlalhlana hoin Thawhlehni khan an thukhawm a. Road Safety Month hman dan tur an rel.
Minister chuan lirthei chungchanga dan kan neih that laiin, ‘road safety’ lamah tan lak a ngai tih a sawi a. India rama road accident a pung chho zel a, hemi avanga thi leh hliam an tam chho zel tih sawiin, heng chetsualna zinga zaa 70 chu lirthei khalh chak vang a ni tih a sawi a ni.
Sawrkar laipuiin ‘road safety’ a ngaipawimawh a, khauh taka dan kenkawh a nih theihnan leh mipui tan a awlsam zawknan khawl thiamna hmanga kalpui a tum a, lirthei fitness endik, license exam, lirthei register, insurance leh thil dangah a duh khauh tial tial bakah e-enforcement hawi zawngin hma an pan zel tih a sawi a ni.
Ministry of Road Transport & Highways (MoRTH) chhinchhiah danin, kum 2024 khan lirtheia chetsual tum 487705 a thleng a, mi 177177-in nunna chanin, mi 471455-in hliam an tuar. e-DAR atanga a lan danin, Mizoramah kum 2025 khan lirthei chetsualna tum 73 a thleng a, mi 56-in nunna an chan a, mi 45-in hliam an tuar.
Lirthei chetsualna chuan mi tam tak nunna a lak mai piah lamah India ram hausakna a nghawng a. MoRTH leh NITI Aayog chhut dan chuan, kumtinin India gross domestic product 2.5% atanga 3% thleng chu accident thlen avanga sensoah a hlohtir ziah tih Transport minister hian a sawi a ni.
8 Kumin Road Safety Month atan thupui chu “Sadak Suraksha Jeevan Raksha (Road Safety Life Safety)” tih hman a ni dawn a. February 2-ah a hawn a ni ang.
8 District tinah Police department nen tangdunin Motor Vehicle Act tlawhchhanin Special Enforcement Drive neih tur a ni.
8 Zirna in leh sawrkar pisa-ah road safety pledge chham tura rel a nih bakah Police leh Transport department thawktuten kawngpui hmangtute, sikul naupang leh lirthei khalhtute tan traffic dan leh hrai, lirthei chetsualnaa inbawihsawm dan tur leh bawihsawmtute thubuai laka an himna tur dan an hrilh ang.
8 Road Safety Month-ah hian district tinin MyBharat Portal-ah hemi thla chhunga lirthei chetsualna thleng zat, hliam zat leh nunna chan zat kum hmasa nena khaikhinna an thehlut tur a ni a, mipui chu mygov.in portal-a Road Safety Competition-a tel theuh tura sawm an ni.
8 ‘Road safety’ chungchang mipui hriat tur zau zawka thehdarh tum a nih bakah lirthei thenkhata bullbar (bumper guard) vuah thin chu midang tan a him lohzia leh pollution check dana hmasawn ngaihna lai, MoRTH tanpuina hmanga Driver Training Centre din theih a ni tih mipui hnena thehdarh tum a ni.