Ruihtheih thila buaite enkawlna, Tawngtai Bethel Camping Centre (TBCC) leh Operation Kingdom Ministry (OKM) enkawltute chu Nilaini khan Social Welfare minister Lalrinpuii’n a kawm. OKM hi Phunchawnga awm a ni a. Ruihhlo ngaite Pathian thu zirtirin, an awm theih chhung (course) hi thla 7/8 a ni thin. Tunah hian mi 400 an awm mek a ni.
OKM hian inkaihhruaina fel tak neiin, ruihhlo ngai sim tawhte chu senior resident atangin worker-ah, chuta tangin executive-ah leh office bearers-ah an tang chho thei a, an chungah hian adviser ho an awm leh a ni.
Firms & Societies Act hnuaiah inziaklutin, mi inphalte pekkhawm atanga kal an ni ber a. Chumi rualin ‘zirlaite’ hi a huhoin an inhlawh thin. In sakna hna hrang hrangah, kawng siamnaah leh lungrem hna te an thawk thin. Vawk leh ar an vulh bakah thlai huan an siam bawk.
Minister hian TBCC dintu leh TBCC Advisory Board hotute nen TBCC tha leh langtlang zawk, inkaihhruaina mumal zawk nena kalpui dan tur an sawiho bawk a. TBCC pawhin dan hnuaia mumal taka kal chu an duhdan a ni tih an sawi a. Ruihhlo ngai tuna haw na tur nei lote a rang thei ang bera enkawl leh turin ruahmanna siampui an ni.
Admission mumal zawka tih leh a hmunhmain a zawh tawk damlo la turin an inruahman dawn tih sawi a ni a. TBCC Advisory Board member Vanhela Pachuau kaihhruaiin uluk zawkin an vil tawh dawn a ni.
Sawrkarin dan angin accreditation a kalpui dawn a, chu dan hnuaia ‘minimum standards’ zawm tur awmte an zawm theihnan centre-te training pe a, kawng hrang hranga puih a tum thu leh kohhran hruaitute pawh pui tura sawm an nih thu Social Welfare minister hian OKM leh TBCC hotute hi a hrilh a. An ni pawhin dan hnuaia inkaihhruaina mumal tak nena kal a ni tur chu an lawm thu leh sawrkar, kohhran leh NGO-te nen thawhtlan chu an duhthusam a ni tih an sawi.
Fel zawkin TBCC kalpui tum dawn OKM Home inkaihhruaina a felfai
Get real time updates directly on you device, subscribe now.
Prev Post