Felix manah Chelsea leh Al-Nassr inrem

Felix manah Chelsea leh Al-Nassr inrem
Saudi Pro League chuan Premier League player hriat hlawh an kawl belh leh dawn ta a, Portugal international Felix Joao manah Chelsea leh Al-Nassr chu pound maktaduai 43.7-in an inrem fel.
Ram tana a khelhpui Cristiano Ronaldo nena kawr inang ha tur Portugal forward Felix hi medical test hmachhawn tura Riyadh khawpuia thlawhluh phalsak a ni tawh a, he thu buatsaih lai hian contract kimchang tarlan hman a ni lo.
Blue Chelsea shirt ha chunga game 40 khela goal 11 thun tling Joao Felix hi an ram club Benfica pawhin beisei ve bawk mah se sum ngah zawk leh amah, player pawhin a thlan zawk Arab team nen inremna an siam ta zawk a ni.
Kum 25-a upa Felix hi nikum nipui insuan hun lai khan Chelsea chuan Atletico Madrid aTangin pound maktaduai 45-in an lei a, Portuguese mana an sum sen hi Premier League club-in an hmulet a; a chhan pawh kumin January thla khan thlaruk chhung atan AC Milan lamah loan-in an chhuahtir a, kha mi manah khan pound maktaduai 5 an lo tel tawh a, tunah pound maktaduai 43.7-in Al-Nassr hnenah an hralh leh dawn ta a, pound maktaduai thum chuang chu an la hlep a tih theih ang.
Tunthla maia Club World Cup hnehtu Blues hian tun nipui thawt chhung hian goalkeeper pahnih Djordje Petrovic leh Kepa Arrizabalaga-te bakah winger Noni Madueke pawh an lo hralhchhuak tawh a; anni pathum bakah hian forward Raheem Sterling, left-back Ben Chilwell, midfielder Renato Veiga leh striker Armando Broja-te chu hralhchhuah turin an phochhuak leh mek a, anniho hralhna man aTang pawh hian pound maktaduai 130 lai an rut tling thei dawn.
Chelsea hian striker Liam Delap, winger Jamie Gittens leh forward Joao Pedro leina manah pound maktaduai 212 an thehchhuak tawh thung a; tun dinhmuna an sengluh leh tum hnaivai chu midfielder Xavi Simons leh defender Jorrel Hato-te an ni.