Fentanyl kaihhnawiah US-in Indian sumdawng hotu liante visa hnuk kir

Fentanyl kaihhnawiah US-in Indian sumdawng hotu liante visa hnuk kir
US President Donald Trump-a sorkar chuan Indian sumdawng hotu (executive) thenkhatte chu fentalyl hmanga sumdawnga puhna a awm avangin an visa hnuh kirsakin an dilna pawh a hnawlsak tih India-a US Embassy chuan a puang.
Ningania embassy-in thuchhuah a siama visa hnuk kirsakte hi mi mal leh an nihna chiang tak engmah an tar lang lo va, eng sumdawnna nge an buaipui tih pawh an tar lang lo.
“Trump-a sorkarin synthetic narcotics hlauhawm taka American-te himna tura hma a lakna kal zelah New Delhi-a US Embassy in New chuan business executive leh corporate hotu liante chu fentanyl precursor tawlhnaa inhnamhnawih nia hriat an nih avangin an visa hnuh kirsak an ni,” an ti.
Fentanyl precursor an tih hian tranquiliser leh bawlhlo dang, ruihhlo hlauhawm tak siam theihna a huam a ni.
Hetianga US-in thu a tihtluk mek lai hian Washington leh New Delhi inkar hi India-in Russian tuialhthei a leisak avangin a khi mek.
Trump-a hian Indian bungrua an lak luhah chhiah 50% a laksak mek a, hei hi New Delhi chuan na taka dodalin Washington-in a thawhpui European ram tam takin Russian energy product an lei ve reng tho niin a sawi.
Kar tir lamah khan Washington leh New Delhi aiawhte hi an indawr a, inremna pawh an neih theih beiseina a lian mek bawk.
US sumdawng hotuten India an tlawh a, Thawhlehni khan Trump-a ngei pawhin Prime Minister Narendra Modi-a chu phone-in a be bawk.
“Ka thian, Prime Minister Narendra Modi-a nen tha takin kan bia,” tiin Trump-a chuan social media-ah a tar lang a. “Piancham chibai le! Hna ropui tak a thawk a. Narendra, Russia leh Ukraine indo titawp tura min thlawpna avangin ka lawm e!” a ti bawk.
An inbia tih a puan hnu lawkah hian Trump-a sorkar hian US Congress-ah India chu ‘ruihhlo tawlhna kalkawng leh ruihhlo siamtu ram lian’ 23 zinga a tel thu a thlen leh nghal thung.
Ningania US Embassy-in Indian sumdawng hotu liante visa a hnuh kir leh pek a phal loh hi ruihhlova dumdawnna ram pahnih an thawh dun thatzia tihlanna a nih thu an tar lang bawk.
“Indian sorkarin chona thuhmun kan beihnaah tha taka min thawhpui avangin kan lawm a. Kan thawh dunna hmang chauhvin ram tam tak tana hlauhawm ni thei phal loh damdawi lakah hian kan mite kan hum thei ang,” tiin embassy chuan a tar lang tel.
Synthetic opioid chak tak, fentanyl overdose avang hian nikum khan US-ah mi sang tel an thi a. Sorkarin a chhinchhiah dan chuan nikumah mi 80,391 overdose vangin an thi a, heng zinga a zahve chuang hi fentanyl vang a ni a. Kum 2023 khan fentanyl vangin mi 76,282 an thi bawk.
Trump-a hi ruihhlo donaah pawh a kal na hle a. Tun thlaah pawh Venezuela bula lawng pahnih, US-a ruihhlo phurh luh tum nia sawi chu thlawhna atangin a kap chhia.