Fertilizer atangin Methamphetamine

Tun hnai khan, Agriculture & Farmers’ Welfare special secretary chuan, loneitute tana siam fertilizer chu a hmanna tur ni loa hman a tam a, ruihhlo leh puakthei thil siamna atan an hmang thin nia an hriat thu a sawi a. Fertilizer thenkhat chu Burma lamah tawlh lutin, fertilizer-a awm chemical thenkhat chu an la chhuak a, chumi hmang chuan methamphetamine an siam thin a, chu chu Mizoramah an rawn tawlh lut leh thin nia an hriat thu a sawi a. Hei vang hian fertilizer dealer-te vil that an ngai a, a zuartuten a rate an tar em tih enfiah a, an tar loh chuan show cause notice pek tur, a ti bawk a ni.
Mizoram leilunga thlai chinte enkawlna tura lakluh fertilizer chu, Mizorama thlai chawm thatna atana hmang tangkai lovin, mihring tihchhiat theihna damdawi siamna hmanrua atan Myanmar ramah a lut chho hem hem mai a, chuta tanga siam chhuah damdawi hlauhawm tak chu Mizoramah a lo let leh hum hum thin tihna a ni a. Fertilizer hi Meth siamna atan an hmang ngei em tih finfiahna hi kan nei kher lo a nih pawhin, ni tina methamphetamine mum Kg tam tak khawchhak atanga Mizorama lo lut man chhuah tur a awm reng theih dan atang hian a dik ngei chu a rinawm a ni.
Eng pawh ni se, Fertilizer hi Indo-Myanmar Border Trade items (India atanga Myanmar-a thawn luh tur) zingah a tel ngei a, mahse Mizoram ramri kaltlanga Myanmar nena kan insumdawntawnna hi dan angin kalpui a la ni lo va, chuvangin border trade items zinga a eng pawh mai hi Mizoram atangin a chhuak emaw, Myanmar atanga lo lut tur border trade items (timber, precious stone, coal, bauxite, dolomite etc.) te a lo lut emaw, dan kalh (illegal trade/smuggling) vek a la ni.
Tuna Fertilizer dealer-te vil that a ngaih thu sawi rik a han nih takah chuan, danin ti tura a tih ang an zawm leh zawm loh hi awlsam taka enfiah nghal mai theih a ni ang a, enfiah a, chhui chhuah harsa lo tur a nih a rinawm. Fertilizer hi sawrkarin a control mek thil a ni a, The Fertilizer Control Order, 1985 hnuaiah dan bawhchhia hremna dan a awm thlap a, dan bawhchhiate chu chawitir, lung in tantir leh license tihtawp thlenga hrem theih an ni.
Mizoram leilung tihthatna tura kan chawk luhte hi, Mizoram mihring suasamna ruihhlo hlauhawm tak siamna hmanrua atan kan lo thawn chhuak thin a nih chuan, hei hi thil pawi (serious) tak a ni a, thuneituten bawhzui se a duhawm hle a ni.