Fiah ngai loin LADC CEM a bang

Lai Autonomous District Council (LADC) chief executive member (CEM) V Zirsanga chuan Ningani khan CEM atanga banna LADC chairman hnenah a thehlut.
CEM V Zirsanga kaihhruai MNF sawrkar rintawk lohna motion a luh avangin Ningani khan special session koh a ni a, special session-ah hian floor test hmanga V Zirsanga’n sawrkar zel tura thlawptu a ngah tawk leh tawk loh fiah tum a ni. Banna a thehluh tak avangin floor test nei loin session hi tihtawp zui a ni.
LADC-ah hian elected MDC 25 an awm a, MNF MDC 9 bakah BJP, INC, ZPM leh independent MDC pakhat theuh, an vaiin MDC 13 ten larsap hnenah V Zirsanga chuan thlawptu a nei ngah tawk tawh lo tih an thlen a ni.
Larsap ruahman angin LADC chairman chuan V Zirsanga’n sawrkarna siam turin thlawptu a neih ngah tawk leh tawk loh hre turin special session hi a ko a ni.
LADC inthlan hnuhnung bera vote tla chu 2020 November 8 khan chhiar niin, MNF-in seat 20 la in sawrkarna an siam a ni.