Fiahna hautak paltlang Alcaraz leh Sinner

Shanghai Masters khelh mekah Pathianni zan khan kumina Grand Slam title pahnih ve ve la tling Carlos Alcaraz leh Jannik Sinner-te’n awlai lo takin last 16 an lut.
World number one Sinner hian set khatna hloh zet chungin Tomas Martin Etcheverry lakah 6-7 (3-7) 6-4 6-2 hnehna a chang a; Alcaraz hian harsa taka set hmasa zawk la chungin Yibing Wu lakah 7-6 (7-5) 6-3 hnehna a sualchhuak ve hram bawk.
Grand Slam title pahnih tela kum kal laia trophy paruk ngawt hawn tawh Sinner hi tum hnih ngawt damdawi hman phal loh test-ah a positive avangin World Anti-Doping Agency lamin hrem tumin an veh mek lai a ni a, Shanghai khuaah Argentine hnehin round of 16 a inpal thleng leh ta phawt a ni.
Italian Sinner hian last 16 lamah Roberto Carballes Baena Spain leh American Ben Shelton inkhela chak zawk zawk a tum leh ang.
World number two Alcaraz khan Chinese world number 560 a paltlang hnuah a tumpui fakin, khelmual chhunga a tlangnel thin angin a khawsa pha lo tih a zep lo!
Shanghai khuaa Last 16 lut zingah Daniil Medvedev pawh telin, darkar hnih leh minute 44 chhungin Matteo Arnaldi lakah 5-7 6-4 6-4 hnehna a chang a, Stefanos Tsitsipas leh Alexandre Muller inkhela chak zawk zawk a tum leh ang.