Zoliansanga Tlau
-- Advertisement --
Fiamthu hi kan tuipuiin kan lawm viau niin a lang a. Mizoram-ah ngawt pawh hun eng nge maw ti atang khan comedian search kum tin kan nei ve ta zel mai. Hnam changkang kan tih hote pawh khuan fiamthu hi an tuipui viau a ni ang ,’American Home Video, Just for laugh’ ti-a hming phuahin T.V (Television)-a en theih turin an tichhuak thin a. Mizoram-a fiamthu thiam kan neih, Pu Laltuvelate thian zahote, Thangkura Drama Party-te, Tuarpuii leh Sunate, Zephyr Drama Club-te hi Mizoram mipuite min lo nuih tir bawk bawk tawh thin tute an ni a, an hlu ngawt mai.
Mizo-te hi hnam hlim tak nge kan nih anga hnam hlim lo tak tih chung changah Dr. Lalhrekima’n hetiang hian a sawi, “Psychiatry kan zir laia depression nei lo kal te dinhmun ka thlir khan, ’Mizote zingah hian depression a awm ve vak dawn loh hi, family leh social support kan nei tha em mai,’ ka ti rilru a; mahse, a lo ni hauh si lo. Tunlai phei hi chuan hnam hlim lo tak, hnam phunchiar tak, sawisel tur hre tak kan ni maiin ka hria. Media hrang hrang,’ Thalaite Aw, Mipui Aw, Fakselna, etc ’- ah te hian mi dang han cho phura han inchhemalhna lam ai chuan insawiselna leh indemna, itsikna rilru leh midang ngaihnepna thu ngaihthlak nuam lo leh chhiar hrehawm pui pui a tam hle. He rilru hi kan kalpui zel a nih chuan kan chauvin kan hniam telh telh ka ring”, tiin. Ni e, Dr. Lalhrekima sawi hi a dik thui viau ang. Hnam hlim lo tak chuan hlim duhin fiamthu tuipui awm reng kan nih hmel. Lalhmingchhuanga Zongte pawhin, “A chang phei chuan hlim lohna ruk tak kan neih avang emaw, hlim mamawha tuihalna leh khawharna kan neih avang emawte pawhin nuihna tur hi a zawnin kan zawng bawk thin. Thawhrimna leh phurrit hnuaia mi an rum hian fiamthu (Comedy) hi hralh a tla thin a ni; ram changkang zawkah chuan fiamthu thiam, comedian lar takte chu an hausa hle thin” a lo tih kha (Mizo Buanpuite, 2021, p. 93).
Amaherawhchu, piangthar thenkhat ten fiamthu reng reng chu dawt phuah chawp, thu tak ni lo dawt rawngkai niin an sawi thin a ni awm e. Fiamthu hi eng nge a nih chiah tih hre turin K.L.Biakchungnunga lehkhabu ziah behchhanin dawt nihphung (logic of lies) leh fiamthu nihphung (logic of jokes) i han bel chiang teh ang u.
Dawt Nihphung –
Dawt sawitu chuan a thu sawi chu : Thu belhchian dawl lo, phuah chawp a ni tih a hria.
Midangte’n thutak pawmin pawm se tih rilru puin a sawi chhuak. Midangin thutak khuka an khuk pui chiah khan hlawhtling a inti a, a lawm.
Fiamthu Nihphung –
Fiamthu thawhtu chuan a thusawi chu : Thu belhchian dawl lo, phuah chawp a ni tih a hria.
Midangin phuah chawp a ni tih hria se, nuihzat se tih rilru puin a sawi chhuak.
Miin an hlimpui a, an nuihpui vak vak khan hlawhtling a inti a, a lawm (POINT OF VIEW VOL-2, 2007, p.60).
A chunga dawt nihphung leh fiamthu nihphung atang khian a point hnihna leh point thumna ve veah khian a danglam tih kan hmu thei ang. Hei vang hian fiamthu hi dawt huang chhungah rin luh ngawt a him lo tih kan hre thei bawk ang. Tin, chubakah mi thenkhatte’n kristianna leh fiamthu hi kalkawp thei lo niin an hre thin a ni mai thei. A chhan pawh kan sakhaw lehkhabu thianghlim Bible (The Holy Bible, Mizo (Lushai) – O.V-Re-edited’13)-in,”Zahmawhte, thu lawi lo sawite, fiamthute pawh chung chu a mawi lo a ni; chung tih ai chuan lawm thu hrilh zawk rawh u,” (Ephesi 5:4) a lo ti si a. Heta “fiamthute” tih hi lehlin kim loh vang niin a lang. Ka English Bible (NKJV)-ah pawh “Coarse jesting” tiin a dah a, fiamthu bawlhhlawh, fiamthu tha lo tih lam hawi a nih hmel hle. Eng pawh ni se, thil reng reng hian thatna a neih rualin that lohna pawh a nei thei tih kan hriat a tha a. Chuvangin, fiamthu tha a awm rualin; fiamthu tha lo pawh a awm thei dawn tih a chiang.
Fiamthu leh nuih pawh hi pawisa hmai hnih nei ang maia inkawp a ni ang. Lalhmingchhuanga Zongte chuan, “Hlim leh lawm avanga nuih a awm a, fiamthu emaw, thil nuihzatthlak dang eng emaw avanga nuih a awm a, mak tih lutuk avanga nuih a awm a, mi dang diriam leh hmuhsitna avanga nuih a awm bawk a. Chutiang zelin, nuih chhan leh nuih dan chi hrang a tam thei hle ang, nuih chhan tha leh tha lote pawh a awm tihna a nih chu… Chutiang a nih avang chuan…Nuihzat tih te, nuihsawh tih te, nuihsan tih te hi chu a chhan a hrisel lutuk lem lo avanga nuihna a ni a, a tuartu awm a ni thin a…” tia a lo sawi bawk kha. (Mizo Buanpuite,2021, p.93).
Mihring inlaichinna atana thil pawimawh 10 enge tia America rama survey & research an neihnaah chuan thil pakhat pawimawh em em an hmuchhuak a, chu chu ‘FIAMTHU(Humour/Humor)’ a ni (POINT OF VIEW vol – 2, 2007, p.61). Tin, lehkhabu pakhat ‘Ikigai’ (2016, p.42)-ah chuan “Humor can help break negative cycles and reduce anxiety” tiin a inziak bawk. Lahmingchhuanga Zongte paw’n, “…fiamthu hi tlanchhiatna kawng (escape route) pakhat anga hman a ni ve bawk thin. |an khawh ngaihna hriat tawh loh tawpah hian, zah zelah kan nui fo thin. Chutiang bawkin mahni invenna atan fiamthu hi kan hmang thin bawk. American Psychiatrist pakhat, Harvard school-a Professor, Department of Psychiatry, Brigham ang Women’s Hospital-a Director ni bawk George Eman Vaillant chuan, ‘Manganna namen lo, kan thunun theih piah lam daih kan hmachhawn chang hian, a nuihzatthlak zawnga lo lak pial mai hi harsat manganna rapthlakin min delh sawr chhe lutuk tur laka invenna (defence mechanism) tangkai tak a ni a. A chang phei chuan, chutiang tuartu dangte chhan chhuahna tha tak a ni thei bawk’” tiin a sawi hial (Mizo Buanpuite, 2021, p.102).
Chuvangin kan inlaichinna tihrisel a, titha tur leh inngainatna thuk zâwkte, inthian thatna ril zâwkte, inkawmngeihna nghet zawkte kan neih theihna turin fiamthu tha kan lo mamawh reng a nih chu! Lehkhabu pakhatah chuan heti ang hian a inziak : “Nuih hi exer tha tak a ni a, kan taksain oxygen a hman theihna a tipung thin” tiin. Kan taksa pawhin nuih a lo mamawh reng a nih chu! Amaherawhchu, kan fiamthu chu zahmawh rawngkai, thu bawlhhlawh, hriat nuam lo, mi dangte rilru tina thei leh mi dangte hmusita hnuaichhiahna rawngkai a ni em tih erawh kan ngaihtuah a tul ang.
Mizo-te hian mi zahawm kan hriat dan hi a dik tawk lo nge. Kan thil thlir dan a dik tawk lo tih pawh hi ngaihtuah chian ngai tak niin a lang. Fiamthu thawhte, nuihte hi zahawmna zia nen inmil lo riauva kan hriat thin vang nge ni ang, fiamthu thiamte hi kan zah lo thla rawk thin niin a lang a. Nia, mi thenkhatte hi chu mi zahawm nih chu sawiloh fiamthuah an kal ral vek ni ber hian a hriat a. Thutak hunah pawh an thutak hlei thei lo thin a, fiamthu chu thutak luahlantu leh takna ei chhetuah kan chantir fo mai thei. Chuti a nih chuan mi zahawm zia pawimawh tak ni a lang: a hun leh hmun hriatte, sawi awm leh awm loh hriatte, tih awm leh awm loh hriatte hi a pawimawh ang. Lalhmingchhuanga Zongte paw’n “Kan mizia leh chim chin a zira kan fiamthu lawm zawng erawh a inang lo thei hle. Chumi awmzia chu, kan puitlin leh puitlin lohte, mi dangte chan ngaihtuah tel pha thin mi kan nih leh nih loh te, kan fin leh fin loh te, Pathian kan tih leh tih loh te a zirin a inang lo thei hle dawn tihna a ni” a lo tih nghe nghe kha.
Siamkima khan, “Mi zahawm chu mi dangin amah an zahchhan amahah vek chuan a awm avangin mi zahawm a lo ni ta mai a ni, kan ti thei ang,” tia a sawi ang khan, keimahniah zahawmna zia mite’n an hmuh a ngai dawn a. Fiamthu han thawh zeuhte hi tha viau mah se, a hun leh hmun kan thliar thiam loh chuan, mi zahawm nih chu sawi loh, mi a, mi mawl nih kan hlawh thei mai dawn a lo ni. Tin, fiamthu thawh chungchangah pawh chintawk neih a tha bawk ang. Eng pawh ni se, mi zahawm zia pakhat a hun leh hmun hriat leh chintawk neih a pawimawh tih kan hria a tha hle mai.
|um khat hmun pakhatah ka zin a, ka thlenin nu chu a tawng tam lo viau mai a. A pasal lah a zin daih bawk si, ngawi rengin chaw kan ei a. Hawihhawm chhuaha ka han biak ngial pawhin a rul tawk bakin min chhang ngai si lo. Min haw ta nge, a pawi ka sawi zawk, nge ni-a zahawmna zia pawimawh tak pakhat tawng tlem thatzia a hria-a, tawng tlem a zir zawk tih pawh ka hre chiah lo. Hemi tum zet hi chuan ‘SILENT IS GOLDEN’ tih thufing tha zet mai kha ka haw ve khawp mai!
Ni e, tawng tlem turin kan inzirtir thin a; mahse, tawng tlem han tih pawh hian a hun leh hmun kan thliar thiam loh chuan, â, sual, mawl, hawihawm lo nih kan lo hlawh thei mai dawn a lo ni. Nuih a tha tih kan hria; mahse, engtik lai pawha nuih erawh a mawi ber lo ang. “Nuihna hun leh hmun ni em em awm lo takah pawh hian kan nui deuh ham ham thei zel a. Khawhar lenpuinaahte, thlan laihnaahte chen hian fiamthu leh nuihna hi a tam thei khawp mai” tia Lalhmingchhuanga’n a lo sawi hial kha (Mizo Buanpuite, 2021, p. 92).
Thuhriltu 3:4 “|ah hun a awm a Nuih hun a awm”
Thuhriltu 3:7 “Ngawih hun a awm a, |awng hun a awm”
Sira (Apokrifa) 20:6-8
“Sawi tur hriat loh vanga ngawi an awm a,
Sawi hun tak nghaka ngawi an awm bawk a.
A hun takah lo chuan pa fing a tawng zen zen lo vang;
Induh, mi â si chuan hun a hre thin lo. Mi tawng tam chuan ngei a hlawh a, Mi ken nachang hre lote chuan huat an kai thin ”.