Fifa Best Award dawngtu Dembele

December 16, Thawhlehni zan khan football a mimal chawimawisa ngaihhluthlawh Fifa Best Award semchhuah a ni a. Fifa Best Award 2025 hi PSG leh France forward Ousmane Dembélé hnenah hlan a ni. Mimal chawimawina sang dawngtu Dembele chanchin tawi kan tarlang ang.
A hun hmasa
Football a mimal chawina sang ber dawng tlak khawpa thiam, football khelh laia FIFA World Cup leh UEFA Champions League a champion bakah Ballon d’Or dawng bawk mi 10 zinga pakhat Dembele hi a hming pum chu Masour Ousmane Dembélé a ni a. May ni 15, 1995-ah a piang a, Vernon, France-a piang leh sei lian a ni. An awmna atanga football zirna hnai ALM Évreux, tuna Évreux FC 27 ni taah hian kum 12 mi vel bawr a nih lai atangin a zir ve lauh thin.
A rualpui zinga ball thiam leh che rang tak a nih vangin Dembele hian hma a sawn chak viau a, kum 2010 khan team lian leh changtlung zawk Rennes in an la lut. Rennes rawlthar team tan kum li chuang zet a khelh hnuin kum 2015 atangin senior team tan a inlan tan. November ni 6, 2015 khan Rennes tan Ligue-ah a vawi khat nan bul a tang a. November 22, 2025-a Bordeaux an hmachhawn tumin a vawi khat nan Ligue 1-ah goal a thun. Rennes tan hian kum khat chhungin Ligue 1-ah vawi 26 a khel a, goal 12 lai a thun. A chet that chhoh em vangin Ligue 1 Player of the year-ah thlan a ni hial a ni.
Rennes-ah tha taka bul atan hnuin German club lian Borussia Dortmund chuan kum 2016 khan kum nga daih contract ziahpuiin an la lut. Dortmund tan hian a khel tha nghal viau. German Bundesliga-a a season hmasa berah vawi 32 khelin goal ruk a thun a, assist vawi 13 lai a nei tling bawk a. Bundesliga-a a season hmasa berah hian Bundesliga Team of the Season ah telh a ni a, Rookie of the Season award a dawng tel bawk.
Hun thim
Senior team-a a khelhna hmasa pahnih; Rennes leh Borussia Dortmund-ah a vul em vangin Dembele hian club lian zawkte ngaihven a hlawh ta hle. 2016-17 season tawp rualin ball thiam leh lar Neymar chuan FC Barcelona chhuahsanin Ligue 1 club lian Paris St Germain a pan. Barcelona hian Neymar hmunruak luahtu tur an zawng a, player tha tak lak luh an duh. Borussia Dortmund-a khel tha hmabak eng tak nei Dembele chu Neymar hmunruak luahtu tura an mi duh a ni a, sum tam tak sengin an la lut. Catalan club lian Barca hian Dembele manah €105 million zet an seng a, hetih lai hian player manto zualte chu Neymar, Paul Pogba leh Dembele te hi an ni.
Sum tam tak senga an lak luh Dembele hian Barcelona-ah bul a tan chhe hle. Mipui hmaa phochhuah a nih tumin ball a sep sual a, nuihzat hlawh nghalin a lakah beisei san a har nghal hle. Bul a tan fuh loh ang bawkin Barca tan hian a chetha tak tak thei lo va, rin a hlawh tak tak thei lo. A hmunruak a luah kha Neymar a ni tlat mai si a, tu tan pawh Neymar thlak zo nih kha chu thil har tak a ni ve reng reng bawk. Neymar thlak zo tur bera ngaih a nih vangin a lakah beisei a sang lo thei si lo. Barca tantuten a laka beiseina sang tak an neih a tihhlawhtlinsak thei lova, a laka an tuihalna a phuhruk sak tak tak thei lo. Hliamin a lo tibuai ve sek bawk nen Barcelona-ah hun thim leh hreawm tak a hmang.
Barcelona tan kum ruk zet a khelh chhungin Dembele hian inelna hrang hrangah vawi 185 a khel a, goal 40 a thun. Barca tan a khelh chhung hian La Liga-ah vawi thum an champion a, Copa del Rey-ah vawi hnih an champion bakah Super Copa-ah vawi hnih an champion bawk.
Thawhlehna ni ropui
Barcelona a beisei phak lo, par a chhuan tak tak theih loh hnuin Dembele hian kum 2023 khan Nou Camp chhuahsanin French Club lian Paris St Germain a zawm. 2023 hian PSG forwar Neymar chuan PSG chhuahsanin Al Hilal a lo pan ve leh chiah a, PSG-ah pawh hian Neymar hmunruak bawk Dembele hian a luah leh a, Neymar kalsan Jersey No. 10 a ha zui ta nghe nghe. PSG-ah hi chuan Neymar a thlak zo ta viau thung a, PSG mamawh chhanna niin hun thim a vai kiang a, atan ni thar duhawm zawk a lo chhuak.
PSG a zawm hnu hian season khatnaah trophy pahnih; Ligue 1 leh Coupe de France-ah an champion nghal. Trophy pahnih an lak theih nan Dembele hi PSG player pawimawh a ni.
2023-24 season a liam a PSG leh Dembele tan season tha leh ropui zawk arawn inherchhuak. 2024-25 season-ah hian PSG hi an la champion ngai reng reng lohna UEFA Champions League-ah an champion a. Ligue 1, Coupe de France leh Trophée des Champions-ahte an champion vek bawk. 2025 chhung vek hian UEFA Super Cup an lak bakah FIFA Club World Cup-ah final an lut bawk. PSG in hetiang zozai hlawhtlinna an chan theih nana player pawimawh leh thawhhlawk zet mai chu Dembele hi a ni. Barcelona-ah phum bo a awm hman lek lek Dembele tan PSG hi thawhlehna ni ropui, hun mawi leh nuam tawntir leh tu an ni.
Ram tan a hnuhma
Dembele hian France kum bithliah team hrang hrang tan vawi 20 zet a khelh hnuin vawi 2016 khan senior team tan a khel tan. Football ram ropui France tan hian inelna hrang hrangah vawi 57 khelin goal 7 a thun tling tawh. World Cup 2018-ah an champion tum khan France team-ah a tel a, World C up 2022 a final an luh tum khan squad-ah a tel leh bawk. Euro 24-ah pawh khan France player langsar zinga mi a ni.
Ballon d’Or & Best Fifa Award kal kawng
Kum 28 mi France forward Dembele hian season liam ta khan PSG tan inelna hrang hrangah vawi 53 khelin goal 35 a thun a, assit vawi 14 a nei tling bawk. PSG hi season liam ta khan an chetha hle a, UEFA Champions League ah a vawi khat nan an champion a, French Ligue 1 a an champion bakah French Cup ah an champion tel bawk. Ligue 1 ah hian goal 21 thunin top scorer a ni a. Ligue 1 leh Champions league ah player tha berah thlan a ni ve ve bawk. Europe a an chet that hnuin PSG hi Fifa Clun World Cup ah pawh an chetha viau a, final an lut. Final-ah Chelsea hneh lovin an tlawm hlauh thung.
Club leh ram tan a chetthat em vangin Dembele hi Ballon d’Or dawng tura rinkai ber a ni a. Barcelona rawlthar Lamine Yamal chu Dembele elpui lian a ni. Tu zawkin nge Ballon d’Or dawng ang tih zawhna awm reng hnuin thawhtan zan khan zawhna chhana awmin chiang lo zawng zawng tihchian a ni ta a. Dembele chuan chawimawina ngaihhluthlawh Ballon d’Or chu a vawi khat nan a dawng ta a ni. Ronaldinho hnen atanga Ballon d’Or a dawng hnuin Dembele hi lawm vangin a mittui a tla hial nghe nghe a ni.
Ballon d’Or a dawn hnuin chawimawina sangin a umzui zel a, December ni 16, Thawhleh zana semchhuah Fifa Best Award semchhuah takah player tha berah thlan a ni leh bawk. Hun thim a paltlang hnuin mimal chawimawina sang pahnih a dawng kawp ta hial a. Dembele tan hlim ni kawl a eng tak zet zet a ni.