Fifa Club World Cup 2025
June ni 14, atang khan FIFA Club World Cup 2025 khelh tan a ni. Club World Cup khelh lo ni fo tawh mah se 2025 atang hian kalphung thar hman a ni a, khawvela khawmualpui hrang hrang atangin club 32 zet an inel tawh dawn. Club 32 te chu tunge nge, engtia tel thel nge an nih tihte tarlangin, FIFA Club World Cup 2025 thlir zauna kan nei ang.
A tobul
Kum 1887 daih tawh khan FA Cup champion Aston Villa leh Scottish Cup winners Hibernian te Football World Championship-ah an inhmachhawn a, Aston Villa in hnehna an chang. He inelna atang hian ram hran club te inelna tur ngaihtuahna sen chhoh a ni a. Kum 1895 khan World Championship tiin a hming thlak a ni a. Kum a kal a, inelna huang a zau zel a, a hming pawh thlak danglam chhoh zel a ni. Kum 1957-ah Intercontinental Cup tiin a hming thlak a ni ve leh a. Inelna neih chhoh zel niin kum 2000 khan FIFA Club World Cup tih a lo ni ta ni.
FIFA Club World Cup-ah hian kum 2023 thleng khan team 7 te an inel thin. Kum 2016 atang khan team 24 te inelna turin tihlen a ni a. Club 24 te inelna hmasa ber thleng turin China thlan an ni a. 2021 a inelna neih tura ruahman a nih laiin Covid 19 hripuiin khawvel a tibuai a, inelna neih theih a ni lo. Club 24 te inelna neih theih a nih tak loh vangin club 32 te inelna turin tihlen a ni zui leh ta a. July ni 14 atangin club 32 te inelna hi USA a khelmualah hrang hrangah khelh tan a ni ang.
Inelna hmachhawn te:
FIFA Club World Cup 2025 a tel turte hian tunhnai kum thum chhunga chethate thlan an ni. Europe khawmualin atangin club 12 ngawt an tel a. South America khawmual (CONMEBOL) atangin team ruk an tel a. Asian Football Confederation (AFC), Confederation of African Football (CAF) leh Confederation of North, Central America and Caribbean Association Football (CONCACAF) atangin team pali theuh an tel a. Confederation of African Football (OFC) leh inelna thlengtu ram atangin club pakhat ve ve an tel thei bawk. Heng club 32 te hi group A – H-ah pali zelin an inthen darh a ni.
Europe atanga inelna hmachhawn club te hi: Chelsea, Real Madrid, Manchester City, Bayern Munich, Paris St-Germain, Inter Milan, Porto, Benfica, Borussia Dortmund, Juventus, Atletico Madrid leh Red Bull Salzburg te an ni a. CONMEBOL atangin Brazil club pali; Palmeiras, Flamengo, Fluminense leh Botafogo te an tel thawt ang a. Anni bakah hian Argentina club lian pahnih; River Plate leh Boca Junior te an inlan dawn bawk. AFC atangin Al-Hilal, Urawa Red Diamonds, Al Ain leh Ulsan HD te an ni a. CAF atangin; Al Ahly, Wydad AC, Espérance de Tunis leh Mamelodi Sundowns te an tel ang. CONCACAF atangin; Monterrey, Seattle Sounders FC, Pachuca leh Los Angeles FC te an tel bawk ang a. OFC atangin Auckland City an tel a, inelna thlengtu USA atangin Lionel Messi khelhna Inter Miami chu he inelna hmachhawn tur hian thlan an ni bawk.
Lawmman
FIFA Club World Cup 2025 ah hian US Dollar Billion 1 zet sem ral a ni dawn. Group stage-a hnehna changtu team in US Dollar Maktaduai 2 an dawng ang a, an inhnehtawk a nih chuan US Dollar maktaduai 1 ve ve an dawng ang. An thlen san ang zelin an sum dawn tur a tam chho zel dawn a. He inelnaa champion team hian US Dollar maktaduai 125 zet an hlawh thei dawn.
Khelmual
FIFA Club World Cup 2025 khelhna atan USA a khelmual 12 zet thlan a ni a. Stadium leh mipui lengzatte chu hetiang hi a ni. Rose Bowl (88,500), MetLife Stadium (82,500), Bank of America Stadium (75,000), Mercedes-Benz Stadium (75,000), Lincoln Financial Field (69,000), Lumen Field (69,000), Hard Rock Stadium (65,000), Camping World Stadium (65,000), Inter&Co Stadium (25,000), Geodis Park (30,000), TQL Stadium (26,000) leh Audi Field (20,000) te an ni.