Fifa Club World Cup 2025 khel lo top five football star

Fifa Club World Cup 2025 khel lo top five football star
Kumin atanga Fifa lamin khel thei tur team zat a tihpun tak chiam Fifa Club World Cup 2025 khelh mek laiin khawvela football club tha ber berte Fifa hruaikhawmna hnuaia an inel meknaah hian tel ve lo langsar zual pangate kan thlirho dawn a ni.
Chu mi hmain, he competition hi kum li dana khelh tura duan niin, champion team chuan kum li chhung an jersey hma lamah champion an nih tarlanna badge an bel dawn a, tuna kan han tarlan turte hi chuan champion badge hi an del dawn lo phawt a ni!
He tournament kal laiah hian khawvela football tha ber ber an inlan mek a, chu’ng zingah chuan Lionel Messi, Harry Kane, Erling Haaland, Kylian Mbappe leh Vinicius Jr. tihte pawh an tel a; chu chu kan sawi tum a nih chiah loh avangin top football star zinga hmuh tur awm ve lote lam hawi chhunzawm ang.
5. Bukayo Saka
Tunhnai season liamta engemawti chhunga top Premier League player pakhat ni chho ngar ngar Bukayo Saka hian a club vawn lai Arsenal chu 2024-25 season-ah eng trophy mah a lakpui zo lo a, Champions League lamah semi-final thlenpui mah se Fifa Club World Cup khel turin north London club a chetthatpui tawk zo lo.
FA Community Shield tih loha Gunners thuam inbel chunga England international Saka club trophyhawn awmchhun la ni chu kum 2000 FA Cup trophy chiah kha a la ni!
Season liamta paruk chhung khan Saka hian football level sang ber khel chhuak mar hle mah se medal awrh zawngin a khawsa thei tlat lo.
Tunhnai season liamta tam zawka English game thununtu Liverpool leh Manchester City luahlan tum viau thin mah se a club vawn lai Arsenal chuan prize money tam ber an hui thei tlat lo zel a, Fifa hnuaia club inelna lamah pawh an star player Saka hmuh tur a awm ta lo a ni.
4. Lamine Yamal
Barcelona rawlthar kum 17-a upa lek la ni chunga superstar nihna kawng zawh mek Lamine Yamal hi tunlai khawvela player lawm leh ngaihven hlawh chhop ber pawl rawn ni chho tawh mah se a club vawn lai berin tournament an khelh phak miau loh avangin United Staes lama club inelna lian a khel ve pha lo a, chawlh hmanga nula senior a chhuahpui chu tunlaia a titi lian a ni mai mai lo thei ta rih lo!
Ballon d’Or dawng thei tura mite rinkai ni pha khawpa season liamta hmang tha he Spanish winger hi a ball khalh leh mi bum thiam kawngah Barca legend Lionel Messi nen hial khaikhin a ni tawh a, mahse, Spanish champion-in tournament an khelh ve miau loh avangin Argentine nena inhmachhawn theihna hun remchang a hmu ta rih lo a ni.
3. Mohamed Salah
Liverpool-in 2024-25 English Premier League title an lak theihna kawnga thawhhlawk Mohamed Salah pawh hi nakkum Fifa World Cup thlengtu pui ber tur US lama club tournament lian khel lo langsar zinga pakhat a ni.
English champion Reds hi Spanish giants Barcelona leh Italy club hlun leh hraw Napoli-te ang bawka tournament khel pha lo an nih avangin Egyptian winger Salah tan Fifa Club World Cup khelhna kawng a ping.
Season liamta khan Salah hian Premier League goal 29 thunin, assist ngawt pawh tum 18 a siam chhuak tling.
Salah tan tak hi chuan nipui chawlh laia US leilunga tournament khelh loh hi a pawi thui lutuk lo mai thei a, a chhan pawh season hahthlak leh tan kawh ngai tak hmang zo hlimhlawt a ni a, a chhungte nena chawlh hman pawh a thlahlel hle tura ngaih a ni!
2. Neymar
Saudi Arabia club Al-Hilal a zawm hnuah hliamin a tibuai chho reng a, Arab team tan pawh chuan game tam a khelhsak thei lo a, a hnuah Brazilian superstar Neymar hi kumin January thla khan a club hlui Santos-ah a kir a, nakkum World Cup-a ram tana inlan theih ngei tumin tunlai hian a hriselna a uluk chho mek a ni.
Kum 33 mi lai ni tawhin, hliam avangin hun rei tak bawksawp mah se mah se he forward hi khawvela footballer hriat hlawh ber pawl a la ni zui zel a, Club World Cup organiser-te pawhin ticket hralh tinuamtu atana an it pawl tling mah se US club inelna lianah a hmel hmuh tur a awm lo.
1. Cristiano Ronaldo
Fifa lam chuan Al Nassr chhuahsan tura sawirik Cristiano Ronaldo hi Club World Cup khel tur team-a a luh chuan a bik takin tournament khelh phalsak a nih theih dan tur dappui inhuam mah se Roanldo hian tournament a khelh loh tur thu a sawi chiang a, a club vawn Al Nassr chu competition khel tura an tlin bawk si loh avangin tel lo langsar ber a ni ta a ni.