FIH Pro League: Netherlands lakah India an tlawm

Nilaini khan Rourkela khuaa FIH Pro League return leg match hun pangngaiah 1-1-in India leh Netherlands an intluktawk a, penalty shootout hmanga chak zawk zawnah mualneitu team hi 2-4-in an vanduai ta zawk a ni.
Bhubaneswar lama first leg match hun pangngaiah pawh team pahnih hi 2-2a inhnehtawkin, penalty khalhluhah 4-2-in India an lo chak tawh a, Rourkela lamah erawh Dutch-ho an dingchang ve ta thung a ni.
World no.1 Netherlands tan hun pangngaiah Floris Middendorp (4th minute) chuan goal a khung zet a, vice-captain Hardik Singh (38th) chuan world number four India siphurh sutin, shootout lamah Araijeet Singh Hundal leh Lalit Kumar Upadhyay-te’n home team tan an khung a, Sukhjeet Singh leh Shamsher Singh-te’n lehlam goalkeeper nena inhmachhawnah an thelh thung.
Kha hnehna khan Netherlands tan point hnih kengin, India-in point khat an hlawhchhuak ve thung.
Naktuk, Inrinniah India hian Australia tum lehin, Pathiannia Ireland an sut tur chu an Pro League home campaign kharna a ni tawh ang.