Fiji rama weightlifting silver medal awrhtu Ruatfela

Fiji rama weightlifting silver medal awrhtu Ruatfela
Vawiina zawh fel tur September 16-21, 2024 chhunga Fiji thliarkar Suva hmuna Commonwealth Junior leh Senior Weightlifting Championships-ah nimin khan India aiawha chhuak Mizo ritchawi chak Lalruatfela chuan junior kg 89 huangah silver medal a awrh.
Ruatfela hi men 89 kg weight category-ah hian junior leh senior inelnaah a chhuak kawp ve ve a; junior bikah hian snatch-ah kg 135 chawiin, clean and jerk an tihah kg 166 nen total kg 301 kg chawiin Commonwealth junior silver medal a hlawhchhuak.
He ta a chawi zat snatch leh clean & jerk belhkhawm hi senior lamah ring nghalin, senior-ah erawh lawmman semna dawhsan lawn zo loin pangana a ni.
Junior 89 kg huanga pakhatna chu tualchhung rawlthar Elder Nehemiah niin, snatch (141), clean & jerk (172) leh total 313 kg a ni a; pathumna chu Ruatfela team-mate Das Hrudananda a ni thung.
Kum 2019 khan Lalruatfela hi Ramhlun Sports Complex-a Mizoram Weightlifting Academy-ah ritchawi zir turin a lut tan a, MSSC hnuaia weightlifting NIS coach Zohmangaiha ke bul atangin a zir chhuak a; nikum April thla khan Patiala, Punjab-a National Centre of Excellence (NCOE) ngei maia training turin an rawn thlang a ni.
September ni 14, Inrinni tlai khan Patiala khuaa national camp atangin Fiji an pan a; silver medal nena a lo kir tur hi Mizoram Weightlifting Association chuan ropui an tiin, an chhuang hle a ni.
Lalruatfela medal lak tawh dan thlir zui ila, international huangah hian July 12-16, 2023 chhung khan Noida, UP-a Commonwealth Youth Weightlifting Championships kg 81 huangah gold medal a awrh tawh bawk a ni.
National-ah chuan medal pathum sualchhuak tawhin, November 9-17, 2022 khan Shillong-a North East Games 81kg huangah gold medal hmangin bul a tan phawt.
December 28-31, 2022 a ni a, Tamil Nadu lama Sub Junior National Championship-ah chuan gold medal a sualchhuak ta.
February 6-10, 2023 khan Madhya Pradesh-a 5th Khelo Youth Games 81kg category-ah silver medal a awrh leh.
Arunachal Pradesh lama December 26 -31, 2023 chhunga Sub Junior National Championship-ah silver medal bawk a hlawhchhuak leh a ni.