Firfiak chet hnu thla khatah Kashmir tlawhtu pung leh tan
Firfiak chet hnu thla khatah Kashmir tlawhtu pung leh tan
Pahalgam-a mi firfiakte chetna na tak a thlen hnua khualzinten Kashmir an tlawh serh hnuah thla khat a liam a, mi tlem azawngin tlawh leh tanin a nih dan pangngai la pha lo mah se a ziaawm leh tawh hle.
A huhova zinten khualzinte tlawh tam hmun, Gulmarg leh Pahalgam hi an tlawh leh nual tawh a, a hma anga tamin an tlawh leh thuai beiseina an nei thar mek.
April 22 khan Pahalgam-a Baisaran hmun nuam takah mi firfiakte chein khualzin 25 leh tual chhung mi pakhat an that a. Hei hian nasa takin heng lai hmun tlawhtu a tihtlem phah.
Chief Minister Omar Abdullah chu miin an state an tlawh leh theih nan tan latu langsar tak pakhatah tangin an phaizawm hmun nuam laiten khualzin a hip leh theihna turin a bei nasa hle.
Chief minister hian khualzinte tlawh thin hmun langsar tak takte a tlawh kual a, sorkar mi pawimawhte nen an tlawh bawk a. Heng hmunah hian tual chhung mi leh khualzin lo awm remchangte pawh a kawm kual thin bawk.
Abdullah-a hian an hmunhma chu hlauhawm a ni lo tih lantir nan Pahalgam-ah council of ministers thutkhawm a ko va, Gulmarh-ah sorkar mi pawimawh thutkhawm a ko tawh bawk.
Pahalgam-a mi firfiakte an chet hnuah khan tlawh tuma hauh lawk tawh tam takin an thulh nghal a. A hmuna awm sa tam tak pawh an haw a, a pan mek pawh an kir hlawm bawk.
Tunah erawh chuan hlauhna chu a kiang hret hret niin an ngai a. Srinagar, Pahalgam leh Gulmarg-a khualbuk neitu, Asif Burza-a chuan, “Mi an lo kal leh tan a. Chief Minister Omar Abdullah-a’n Pahalgam leh Gulmarg tlawha thutkhawm a ko khan awmzia a nei hle a. Khualzin thilah hmasawnna a thlen a ni,” a ti.
A hmaa an khualbuk hauh tawh thulh leh tam tak chuan an hauh thar leh tawh niin a sawi bawk.
“Miin an lo ngaihven leh tan a, Kashmir hi an lo la hre reng a. Lo kir leh an duh nyal hlawm a ni,” tiin Burza chuan a sawi.
Chief minister-in a sawm angin Kashmir hi mi pawimawhte pawhin an tlawh a, company-te pawhin an thutkhawm pawimawh chu Pahalgam leh hmun dangah an nghat hlawm niin a sawi bawk.
Gandhinagar, Gujarat atanga tlawhtu, Afsa Malik-i chuan Kashmir-ah hlauh a neih loh thu leh mi dangte pawh tlawh ve se a tih thu a sawi a. “Kashmir ka kal vawi khatna a ni a, hlauh tur a awm lo va, a him vek. Venhim hna thawktute hmun tinah an awm a ni,” tiin PTI hnenah a sawi.
Kashmir-a miin an tlawh tam zual – Pahalgam, Gulmarg leh Sonamarg-ah hian firfiak chetna thlen hnuah tlawhtu an tlahniam nghal vak am tunah erawh ni tin an pung hret hret zel a. A huhova kal te, chhungkuaa kal te pawh an awm leh tawh.
Khualzin lo buaipuia ei zawngte chuan a eibar a nghawng theih avangin tan pawh an la nasa a, mi pawhin an tlawh leh thuai thuai an beisei hle a ni.