Fish Farmers’ Day hmang

Central Agricultural University (Imphal) hnuaia College of Fisheries chuan North East Society for Fisheries and Aquaculture (NESFA) India nen tangdunin July 10 khan 24th National Fish Farmers’ Day an hmang a. Dr Hiralal Choudhury and Dr KH Alikhuni ten tui leh luia nungchate tana rahbi thar ‘Induced Breeding Technology’ an hmuhchhuah hriatrengna leh chawimawina atan hman a ni.
He ni hi CAU Imphal-a Directorate of Extension Education director Prof Dr Ph. Ranjit Sharma chuan a hmanpui a. Sangha dil siamtute leh loneitute thawh nasat zia a hmuhin lawmawm a tih thu a sawi. Hmarchhak state-a sangha dil neitute leh loneitute titha zual – Lalhmunsanga (Mizoram), Rockson Kashung (Manipur), Khalainbor Pale (Meghalaya), Yeamoty Pigyor (Arunachal Pradesh), Da Norbu Sherpa (Sikkim), Ramdi Thou (Nagaland), Jaydev Sarkar (Assam) leh Sujit Das (Tripura) te hnenah lawmman a hlan a ni.
Fish Farmers’ Day hmannaah hian sangha dil siamtute hnenah sangha chi sem a ni a. Sangha khawia eizawng mi 200 chuang an tel. National Bank for Agriculture and Rural Development (NABARD), ICAR-Regional Center Tripur hotute bakah midang sawm bikten an hmanpui a ni.