FKA Twigs-i’n Shia LaBeouf laka $10M lawsuit a hnukkir

FKA Twigs-i’n Shia LaBeouf laka $10M lawsuit a hnukkir
Singer FKA Twigs chuan a ex, Hollywood star Shia LaBeouf laka intihduhdah thubuai a theh luh chu kum li hnuah a hnukkir a, thubuai ngaia court-a kal nawn tawh lo turin an inrem nghal bawk.
FKA Twigs (a hming tak Tahliah Debrett Barnett) hian a ex Shia LaBeouf hian rilru hahna tam tak a thlen niin a puh a, Shia LaBeouf hian mipat hmeichhiatna hman atanga inkaichhawn theihna infection pawh hre reng chungin a kai lui niin a puh bawk. Thubuai hi 2020-a a theh luh kha a ni a, mahse, tunah chuan a thubuai hi hnukkirin, hun lo kal leh turah pawh he thubuai ngai hi nei nawn tawh lo turin an intifel nghal bawk a ni.
FKA Twigs ukil leh LaBeouf ukil te chuan thuchhuah intawm siamin, court pawn lamah inremna an nei thei ta niin an tarlang a, mahse, engtiang chiahin nge inremna hi an neih tih erawh puanzar a ni dawn lo a, Twigs leh LaBeouf ten hlim taka hmalam an pan zel theih nan an induhsak tawn niin an tarlang bawk.
FKA Twigs, kum 37, leh Shia LaBeouf, kum 39, te hi 2019 khan kum khat vel an inkawp ve zuai a, mahse, 2020 khan FKA Twigs hian Superior Court of California-ah a ex lakah hian thubuai a theh lut ta nghal a, an inngaihzawn chhung rei lo mah se rilru leh taksa lamah hrehawmna nasa tak a tawh phah niin a lawsuit-ah chuan a tarlang.