FMGE&W-in healthcare scheme thar ring zo rih lo

Mizoram sawrkar hnathawkte inzawmkhawmna, Federation of Mizoram Government Employees & Workers (FMGE&W) chuan Mizoram Universal Healthcare Scheme chu a thu chuan tha viau in lang mah se, a taka kalpui tur chuan rin zawh a la har nia ngaiin, sawrkar hnathawk huam tir lo tura nawr chhunzawm zel an tum.
FMGE&W hian Thawhlehni khan Aizawlah general conference vawi 33-na an hmang a. An thu ngaihtuah zingah Mizoram Universal Healthcare Scheme (MUHCS) hi a tel. Hemi chungchanga Special Assembly an neiha thuthlukna siam tawh chu an nemnghet a, MUHCS hi a system a la felfai tawk loh avangin sawrkar hnathawkte huam rih lo tura sawrkar nawr chhunzawm nise, tiin thu an titlu.
The Aizawl Post thudawn danin, FMGE&W hian MUHCS-a sawrkar hnathawkten sum an pek/chawi ve ngai lam kha chu pek an inhuam viau rualin, empanelled hospital-te pawh sawrkarin inremna (MoU) a la ziahpui loa, kalpui dan tur system hrim hrimah fuh tawk lo a la tam a, cashless-a kalpui tum dan damlo refer danah pawh inhnerem lo lai a awm a, tun rum ruma hman ve nghal chu an ngam loa, medical reimbursement an hman mek ang chu la hman rih an duh zawk tih sawi a ni. Hemi chungchang general conference hma zan khan chief minister an sawipui tih an sawi bawk.
General conference-a thusawitu FMGE&W president Er R Lalrammawia chuan Mizoram sawrkar hnuaia thawkte chuan platform hrang hrang atangin beihna an tawk ta nual a, an ni lam atangin an insawifiah ve ngai lem loa, tunlaia an dinhmun thlirin sawrkar hnathawkten Mizoram tana theihtawp chhuaha an thawh thinte puan chhuah leh tarlan ve thin a ngai tawh nia a lan thu a sawi.
Mizoram sawrkar hnuaia thawk zawng zawngten central /state sawrkar danga an anpui (counterpart) te aia hlawh sang zawk la anga sawi an ni fo pawh a dik tawk lo tih sawiin, “Dearness allowance (DA) ah sawrkar laipui hnathawktute chuan ni 1.1.2025 atang khan DA 55% an la tawh a, keini chuan 40% chauh kan la. Hamthatna kan neih thin hrang hrang pawh tunah chuan a awm tawh lo deuh vek a; hamthatna kan dawn ve chhun zing ami Medical Reimbursement (MA Rules 1944) pawh MUHCS-a thlak a ni ta a ni,” a ti.
FMGE&W general conference-ah hian affiliated association 99 atangin palai 650 chuang an tel a ni.
FMGE&W thurel dang:
8 Mizoram sawrkar hnuaia hna lak hi, public interest thlirin, department-in an mamawh ang zelin rualkhai zawka lak ni rawh se
8 Mizoram sawrkarin a hnuaia thawkte tan Guidelines for framing of Service Rules/ Recruitment Rules a siama qualifying service ngai zat hi a pumpuia ennawn ni rawh se
8 Vacancy based roster (VBR) chungchangah relaxation a awm leh theihnan hma lak ni rawh se
8 FMGE&W office building neih a nih theihnan hma lak ni rawh se
8 Sawrkar laipui hnathawkte DA pun ruala Mizoram sawrkar hnathawkte DA a pun ve zel theihnan hma lak zel ni rawh se
8 Mizoram sawrkar hnathawkte kan hnathawhna hmun theuhah ram leh hnam tana thahnemngai tak leh neitu rilru pu chunga thawk zel turin infuih thar ni rawh se.