FMR thiah leh ramri hung dodalnaah ZORO thlawp

FMR thiah leh ramri hung
dodalnaah ZORO thlawp
Hnampual zirlai pawlte intelkhawm chuan Free Movement Regime thiah leh ramri hung tum dodalnaa Zo Reunification Organisation hmalakna chu tha an tih thu an sawi.
ZORO Gen. Hqrs hruaitute leh Joint Hnampual Students’ Organisation Aizawl chuan February 14 khan FMR thiah leh India sawrkarin Indo-Myanmar ramri hung a tum chungchang an sawiho a. ZORO general secretary L Ramdinliana Renthlei chuan FMR thiah leh ramri hung hian kan hnam inpumkhatna a tichhe nasa dawn hle a, hei hi hnam tan a pawi hle dawn, tia sawiin, ramri hung a nih chuan nasa takin ram kan chan dawn a, kan eizawnna, kan leilet kan chan dawn tih a sawi.
He thil pahnih hi India sawrkarin Zofate min danchep a tumna hmanrua pakhat a ni, tiin, UNO-in kan dikna chanvo min pek chu humhim turin theihtawp chhuah a ngai tih a sawi a ni.
ZORO hruaitute leh Joint Hnampual Students’ Organisation Aizawl hruaitute thukhawm hian he thila ZORO hmalakna tha an ti a, a theih ang anga hma lak ho zel nise, an ti
Hnampual Students’ Organisation Aizawl hi Mara Students’ Organisation, Lai Students’ Association, Ranglong Students’ Union, Siamsinpawlpi, Pang Zirlai Pawl, Mizoram Bawm Student’s Association leh Hmar Students’ Association inzawmkhawm an ni.