Foden, Palmer leh Watkins inpuchhuak
UEFA Nations League-a Republic of Ireland leh Finland hmachhawn England squad tharah Phil Foden, Cole Palmer leh Ollie Watkins-te chu damlohna leh hliam avangin an tel lo.
Anni pathum hi 2024 European Championship final khel England squad-ah khan telin, Nations League fixture lamah pawh an hmel hmuh zui tur awm dawna a lan laiin harsatna an tawk zui ta a ni.
Tunhnai lawka PFA Player of the Year atana thlan Manchester City forward Foden hi interim England boss Lee Carsley chuan squad enchhinah a ko zet a, mahse, damlohnain a tlakbuak tak avangin squad puitlingah a lang ta lo.
Chelsea forward Palmer leh Aston Villa striker Watkins-te pawh hi St George’s Park-a in report tura tih an nih laiin an hliam tawh atangin an la dam fel lo a, ngaih awh lehna programme-a an inchiah mek avangin an khelhna club ve ve lamah an khawsa zui zel rih dawn niin Football Association thuchhuah chuan a tarlang.
England hian September ni 7, Inrinni hian Dublin khuaah Republic of Ireland an luhkhung ang a, ni thum hnuah Finland nen Wembley-ah an insu zui leh dawn a ni.
He game pahnih hi kumin July ni 14 zan Euro 2024 final-a Spain an hneh loh hnua Three Lions chetchhuah lehna hmasaber tur a ni.
An champion zawh loh hnu lawk khan Gareth Southgate chuan banna a thehlut a, August ni 9 khan FA chuan manager nghet an sengluh hmaa national senior team lo kaihruai lailawk turin under-21s boss Carsley a ruat a, he interim manager ho hian Nations League match hnih an khel phawt dawn a ni.
Nations League game hnih khel tur hian hriat la hlawh tam lo rualkhat Angel Gomes, Tino Livramento, Morgan Gibbs-White leh Noni Madueke-te koh zingah an tel.
Lille winger Gomes, Newcastle defender Livramento, Nottingham Forest midfielder Gibbs-White leh Chelsea forward Madueke-te hi England Under-21 manager hna a chelhna zawna Carsley-a lo hrualhrat an ni a, an pu hian senior team lamah a duhsak zui ta a ni.
England preliminary Euro 2024 squad-a tel pha lo Manchester City playmaker Jack Grealish leh Manchester United defender Harry Maguire-te pawh interim coach hian a kokir leh ta bawk.
England squad
Goalkeepers: Dean Henderson (Crystal Palace), Jordan Pickford (Everton), Nick Pope (Newcastle United)
Defenders: Marc Guehi (Crystal Palace), Ezri Konsa (Aston Villa), John Stones (Manchester City), Trent Alexander-Arnold (Liverpool), Levi Colwill (Chelsea), Rico Lewis (Manchester City), Tino Livramento (Newcastle), Harry Maguire (Manchester United)
Midfielders: Conor Gallagher (Atletico Madrid), Kobbie Mainoo (Manchester United), Declan Rice (Arsenal), Morgan Gibbs-White (Nottingham Forest), Angel Gomes (Lille)
Forwards: Jarrod Bowen (West Ham), Eberechi Eze (Crystal Palace), Jack Grealish (Manchester City), Anthony Gordon (Newcastle United), Harry Kane (Bayern Munich), Noni Madueke (Chelsea) Bukayo Saka (Arsenal)