Football arsi lian dang Beckenbauer herliam ve leh ta

Football arsi lian dang Beckenbauer herliam ve leh ta
Captain leh coach ni chunga World Cup-a Germany champion-puitu Franz Beckenbauer chu kum 78 mi niin mual a liam ve leh ta tih German news agency DPA chuan Thawhtanni khan an tarlang.
Karliamta mai khan player leh coach ni chunga World Cup champion ni thei pathum zinga pakhat dang Brazil legend Mario Zagallo thih thuin football khawvel a lo thawng tawh a, tunah chuan player leh coach ni chunga world champion ni thei zingah France pa ropui Didier Deschamps chiah a dam ta.
Germany great Beckenbauer hi Germany football player ropuiberte zinga pakhat niin, kum 1974 khan a captain-na hnuaiah World Cup trophy an chawi a; kum 1990 tournament-ah khan manager ni chungin Germany a champion-pui leh thei ngat a ni.
A inkhelh lai kum 1960 leh 70 bawr chhoah khan Beckenbauer hi West Germany leh Bayern Munich tlarhnung innghahna lian niin, khelmuala a awm leh awm loh hi a team-mate rualte tana danglamna thlentu a lo ni tawh thin a; ball a chan laia a dam dap thin leh tlarhnung atanga a ball semchhuah thiamna kha mite ngainat hlawh zualtirtu niin, central defensive sweeper role kha a hlawhtlinpui takzet a ni.
Hminglema ‘Der Kaiser’ (The emperor) an tih thin Franz Anton Beckenbauer hi kum 1945 September ni 11 khan Munich khawpuiah a lo piang a, a chhungte’n thlamuang taka an dawmhlumna hmun erawh Salzburg, Austria a ni thung.
West Germany an nih laia match 103 khel tling Beckenbauer hian 1972 European championship-a a ram a champion-pui hma lawk khan an ramin World Cup a thlen tumin kum 1966 final-ah England hneh loin world champion nih theihna hun tha dang a lo bawhpelh tawh bawk a ni.
1966 World Cup final-a England laka 4-2-a an tlawm tum khan Beckenbauer hian midfielder niin khatih laia England innghahna pawimawh, midfielder leh centre-forward ni kawp ve ve thei Bobby Charlton kha a veng a, tournament zawh lamah erawh a position larpui leh hlawhtlinpui zawk defensive sweeper lamah a let zui leh ta a ni.
1966 World Cup-ah khan kum 20 mi lek ni chungin goal li zet a khung tling a, tournament best young player atan thlanchhuah a ni zui nghe nghe.
Defender ni thin Beckenbauer hian Bayern Munich tan game 582 a khel tling a, player leh manager ni chungin German top flight champion a ni thei ngat bawk.
Kum 1970 bawr chho laihawlah khan a team Bayern Munich kha club tha ber niin, a zawn zatin tum thum European Cup a lakpui bakah Bundesliga title pathum bawk a lakpui bawk. Beckenbauer hi hi vawihnih lai European footballer of the year atana thlan a lo ni tawh nghe nghe.
National team manager a nih laiin West Germany chu 1986 World Cup final-ah Argentina hneh loin an tlawm a, mahse, kum li hnu Italy ram World Cup-ah combined German team chu a champion-pui zui ta tho a ni.
Beckenbauer hi kum 1984-1990 chhung khan national team manager niin, kum 1990 khan Marseille a enkawl zuai bawk.
Kum 1996-a coaching a chawlhsan hnuin football administration lam a luhchilh zui leh a; Bayern president a nih tawh bakah kum 1998 khan German Football Association (DFB) vice-president hna a chelh a, a hoin German committee chuan 2006 World Cup thlen an dil hlawhtling nghe nghe.
A hmingthat a kaltluan hle laiin kum 2018 leh 2022 World Cup-a corruption chhuitute a thawhpui that loh avangin kum 2016 khan FIFA ethics committee lamin sum an chawitir!
Ballon d’Or vawihnih dawng tawh ‘Der Kaiser’ thih thu puangtu German news agency DPA chuan chhungkaw thuchhuah tarchhuakin, “Ka pasal leh kan pa thih thu lungchhiatthlak puan a lo ngai ta a, nimin, Pathianni khan a nupui fanau, a tu leh fate’n kan hual taih laiin thlamuang takin a muhil hlen ta.
“Kan lusunna hi thawm nei loa min lo zawm ve turin kan ngen che u a, zawhna awm thei min pumpelhsak hram turin kan ngen bawk e,” tiin Thawhtanna khan Beckenbauer thih thu leh an chhungkuain chhiat an tawh laia an mimal zalenna zahsak turin khawvel hriatah an puangzar.
A club hlui leh Germany rama club hlawhtlingber ni bawk
Bayern chuan thuchhuah siam nghalin, “FC Bayern khawvel chuan a nih thin dan a pha ta lo nghal a, Bayern khawvel chu thawklehkhatah a lo thim thut a, a reh vawng vawng a, a rethei ta zawk bawk.
“Beckenbauer hi awm lo se la chuan Bayern hian tuna a nihna hi a luah pha ngai lo ang,” tiin an club tana a hlutna an tarlang tel.
Player a nih laiin Bayern tan Beckenbauer hian league title pali lain, kum 1974, 1975 leh 1976 khan captain ni chungin German giants chu European Cup a lakpui tih tarlan a ni tawh bawk a; kum 1982 khan Hamburg chu Bundesliga title a lakpui leh bawk.
Bayern a chhuahsan hnuah New York Cosmos tan khelin, Brazilian great Pele nen khan North American Soccer League poster boy an ni dun ta a ni.
Kum 1983-ah inkhelh a chawlhsan a, a chawlh atanga kum khat pawh tling loah manager lama tawnhriat la neih eih lo chungin West Germany manager atan sengluh a ni!
Tarlan tawh angin, coaching lamah pawh a hlawhtling chho leh ta zel a; Mexico rama 1986 World Cup final-ah a team chakpui zo lo mah se kum li hnuah trophy hlu bik chu a chawipui ta tho a; khatih laia a team khan semi-final match pakhatah England hnehin, final-ah champion lai Argentina lakah phuba an la zui leh ngat a ni.
Bayern honorary president leh a team-mate hlui ni bawk Uli Hoeness chuan Beckenbauer chu an club-in mihring a neih hlutber niin a sawi a, “Player, coach, president, person: a nihna engamah hi theihnghilh theih a ni tawh lo ang. Mite chuan Franz Beckenbauer-a hun lai khan football tak tak an hmu tiin an sawi thin. Ka thian a ni a, kan zavaia tan thilpek a ni,” a ti.
Germany manager Julian Nagels-mann pawhin Franz Beckenbauer chu German history-a footballer tiin a fak a; libero (sweeper) nihna a hlawhtlinpui rual khan football game a thlakdanglam nghal tih a sawi.
Kum 1986 leh 1990 World Cup-a England striker Gary Lineker chuan Franz Beckenbauer thih thuin a thawnzia sawiin, football-a mi ropui berte zinga pakhat a nih thu a tarlang tel.
Bayern Munich leh Germany forward Thomas Muller pawh a tawngchhuak a, “Kan club chanchina footballer ropuiberte zinga pakhat chuan vanduaithlaktakin min kalsan ta. Thlamuang takin chawl ang che, Emperor Franz. Germany rama football tana i hnathawh hi kan hre reng tawh ang,” tiin.
Beckenbauer-a team-mate hlui leh Bayern chief executive hna chelh pha zinga mi Karl-Heinz Rummenigge pawhin thlahna thu chhakchhuakin, “FC Bayern-ah ka captain niin, national team-ah ka coach a ni a, Bayern-ah kan president ni lehin, a hna chelh tawh zawng zawngah hian a hlawhtling a ni satliah mai lo a, a pui a ni tawp.”
DFB president Bernd Neuendorf pawhin an sun mek chu an sport buaipuiin player a hrin tawh zinga a thaber huang luah pha a nih thu leh DFB mai ni lo football tan hnutchhiah hrawl tak neitu a nih thu a sawi.
Fifa president Gianni Infantino leh Uefa president Aleksander Ceferin-te chu Beckenbauer uina leh sunna thu sawitu hraw dang an ni a; League lamah Premier League leh club lamah Bayern hmelma lian Borussia Dortmund bakah kum 1990 World Cup semi-final penalty shootout-a Franz Beckenbauer telna West Germany laka an tlawm tuma England goal-veng Peter Shilton, Liverpool leh Scotland legend Kenny Dalglish-te pawhin Germany great ui thu an puangchhuak ve bawk.