Footballer chhuanawm Lallianzuala Chhangte

A hmel en ngawt pawha a sual lo a nih tih hriat nghal theih, a nui hmel atanga a chapo lo a ni tih rin thiam nghal theih leh a tawngka chhuak atanga Pathianni tih mi a ni tih hriat har lo tak tlangval pakhat a awm a, amah chu Lallianzuala Chhangte a ni. A tlan chak em vanga ‘Mizo kawlphe’ (Mizo Flash’) an tih mai Lallianzuala Chhangte chu kum 2022-23 a India footballer tha bera thlan a ni a. Indian Super League 2022-23-a player tha ber leh khelh pui player ten player tha bera an thlan FPAI Indian Player of the Year – 2023 chawimawina dawngtu, footballer chhuanawm a ni.
Lalianzuala Chhangte hi CVL Hriatpuia leh T. Laroliani te fa mipa hlir pali zinga a pathumna ni turin June 8, 1997 khan Christian Hospital, Serkawn-ah a piang a, naupang duhawm tak a ni. A pumrua lian lo va, 5 ft 5 in chauha sang a ni a, footballer ropui Diego Maradona nen khan an intiat tawk hle. Nuapan tet atanga football ngaina tak mai a ni a. Midang khelhpui tur an awm loh pawhin an unauin zing leh tlaiah an inkhel mai thin a. Pahnih pahniha tanga an intumtawk theih em vangin an inhlimchhuah a, midang an ngai ngai lo.
Football tuipui tak ni bawk mah se, a pa CVL Hriatpuia hi zirtirtu a ni a, a nu pawh zirna kawnga kum naupang zawkte kaihruai a lo ni bawk nen zirna ngai pawimawh hmasa tura zirtir leh khuahkhirhna hnuaia seilan a ni. Khaw en hmain lehkha an zir a, an zir tur ang ang an zir zawh hnuin football an khel zui mai thin. Inkhela an kal ruk changin vuak tawrh chang an nei ve hial thin bawk. A nu leh paten an inkhel tur an khap a, ball leh ball boot an neih loh chang pawhin infiamnaa tuipui em em thintu a pu C. Dochhunga’n a ruka ball leh ball boot a leisak chang a awm. A pu hian a tute inkhel hi a tawiawm peih em em a, an tute ball pet liam a umsak thin bakah C. Thuamluaia mual thlenga a zui chang a awm bawk.
A pumrua lian lo mah se Lianzuala hi a tlanchakin a che rang em em thin. A taima a, a thawk rim em em bawk. Kum 2014 khan player tha tak tak la khawmin Lunglei FC din a ni a. Lunglei FC hmachhawp lian tak chu Mizoram Premier League khelh a ni. MPL playoff khel tur Lunglei FC player zingah Lianzuala hi naupang ber a ni a, naupang ber a nih vangin mi dang aia a thawhrim a ngai tih a hria a. Taitesena entawnin zingah a tho hma ber a, inpeih hma ber a nih bakah training na atang bang tlai ber a ni thin bawk. chu a thawhrimna chu malsawma awmin kum 13 mi lek ni chungin MPL play-off ah hian goal 5 a thun a, topscorer a ni hial.
Lunglei FC hi MPL khel turin tlinpui bawk mah se Liverpool FC International Academy – DSK Shivajians a lut tur thlan zingah a tel vangin MPL-ah a inlan ve ta lo thung. DSK Shivajians ah mumal leh awm ze nei zawka a zir hnuin hma a sawn chak hle. Elpui tam leh hautak tak karah dingchangin, inzir chhunzawm tur fiahna hnuhnun leh hautak tak a paltlang a. Football club ropui Liverpool FC kiangah training te neiin football khawvelah a ring a rawlh thuk zel.
Kum 2015 atangin India Under 19 tan a khel tan a, India Under 23 tan a khel thuai bawk. Kum 2015 vek hian India senior team tan a khel tan. India senior team tan a khelh hmasak ber hi SAFF Cup championship-ah a ni. December, 25 a Sri Lanka an hmachhawn tumin bench atangin a lut. December 27 a Nepal an hmachhawn tumin India tan a goal hmasa ber a thun. Hemi tuma goal a thun hian India tana goal thun thei naupang ber tiin hriat lar a ni nghal hat a. Chik zawka record en a nih hnuin India tana goal thun thei naupang ber chu Mizo tlangval tho Jerry Zirsanga a lo ni zawk a, Lianzuala hi pahnihna a ni.
DSK Shivajians tan a chetha a, India tan goal a thun tak hial vangin North East United FC chuan kum 2016 khan an la lut a. North East United hi Lianzuala profesional club hmasa ber a ni. North East United tan a khelh hnun Delhi Dynamos chuan kum 2017 khan a la lut. Kum 2019-ah ISL team lian Chennaiying FC in an la lut ve leh a, football khawvelah Lianzuala a lian deuh deuh zel. Chennaiying FC atang hian football a par a chhuanna Mumbai City FC hi kum 2022 khan a zawm. Mumbai City FC-ah hian a vul ta viau a, ISL League champion a nihpui bakah Durand Cup-ah final a hruai thleng bawk.
2022-23 season hi Lianzuala’n season a hman that ber tum a ni. Mumbai City FC tan vawi 22 a khel a, goal 10 zet a thun bakah assist vawi ruk ngawt a nei. Durand Cup-ah Mumbai City FC tan vawi sarih khelin, goal sarih ngawt a thun a, assist vawi thum ngawt a nei bawk. Club tan inelna hrang hranga a chet that ang bawkin ram tan a khel tha zui viau bawk. India hi Hero Inter Continental Cup leh SAFF championship-ah a champion pui. Heng inelnaah pahnihah te hian India player pawimawh a ni ve ve a, Inter Continental Cup final-ah goal khat a thun a, assist nei bawkin ‘Man of the Match’ a ni hial a ni. Season liam ta bikah khan India tan vawi 12 a khel a, goal goal hnih a thun bakah assist vawi hnih a nei bawk. India tan hian inelna hrang hrangah vawi 41 khelin goal 8 a thun tawh.
Club leh tam tan a khelh that em vangin mimal chawimawina ten an umzui nghal. AIFF Men’n Footballer of the year – 2022-23-ah thlan a ni a. ISL 2022-23 Player of the Season’ ah thlan a ni bawk a, he chawimawina hi India player zinga dawng thei pahnihna a ni nghe nghe a. India player zingah Lianzuala leh Sunil Chhetri te chauhin an la dawng. ISL-ah hian foreigner player tha tak tak an awm teuh vangin chawimawina dawn a harsa em em a. Chawimawina dawn a harsat em vangin Lianzuala chawimawina dawn pawh hian ngaihhlut a hlawh viau. ISL player tha ber a nih bakah a khelhpuite ngeiin player tha berah an thlang a, FPAI Indian Player of the Year – 2023 chawimawina a dawng thei hi a hlu hle bawk.
ISL 2022-23 season-ah ISL champion ni zo lo mah se 2023-24 season-ah Mumbai City FC an chetha zui leh. He season-ah hian uiawm takin League champion ni zo lo mah se play-off final-ah chakin an champion a, ISL champion tak tak an ni ve ta, hun rei tak a lo nghah tawh chu Mizo tlangval LZ-a chuan a nghakchhuak ta nge nge. Club leh ram tan a chetthat chhunzawm em vangin AIFF Men’n Footballer of the year 2023-24 ah thlan a ni nawn leh bawk.
Hlawh sang tak hlawh a, chawimawina ngaihhlut hlawh tak tak dawng turin Lallianzuala Chhangte hian kawng awlsam a zawh bik hauh lo. Kawng chhuk leh chho, bumboh leh kual, kham leh suar a paltlang hnua hlawhtlinna sualchhuak a ni.
Tlan chakin, che reng viau thin mah se trail a hmachhawnnaah hlawhtlinna a chang hleithei lo. A beisei anga hlawhtlinna chan theih loh laiin ‘Catch them Youg’ programme hnuaiah awmze nei zawkin football a zir. Football zin kawng a zawhnaa a bana kaitu pawimawh tak ni ta coach R. Lalmuankima nen an intawng. Coach thawkrim R. Lalmuankima hmin tumin rim takin a thawk a, kal hma ber leh haw tlai ber a ni ziah a. Coach hmuh loh lai pawhin a inthlahdah ve ngai lo. Khaw lum tak hnuaiah a hunah mut a thulh lo a, ruah sur hnuaiah zing tawh a thul ngai hek lo.
A club zawm hmasak ber North East United-a bul a tan tha lova, a khel tlem viau. He club-a awm lai hian lungleng leh hreawm tih vang haw chak rum rum chang pawh a nei hman. Delhi Dynamos-ah khel tha thawkhat mah se an team hi an che chhe tlat thung a. Team lian zawk Chennaiying in hlawh sang zawk hlawh turin a la a, beiseina thar a nei. South India team lian tan bul tan chhe lo mah se coach in khelh dan phung (formation) a thlak vangin harsatna a tawk zui a, a ui chuang awm leh mai mai. Mumbai City FC a zawm hnu pawhin a insiamtha mai thei lova, bul a tan phak lo leh phawt. Chu mai a ni lo..India Under -17 tan a khelh laiin an coach chuan , “Under 14 tana khel tlak pawh i ni lo, football hi khel ve tawh suh”, tih hial te a lo tawk tawh a. Bench-ah a thut ngun vangin a khelhpui ten tihel nan Nihawichi an leisak hial changte pawh a awm.
Khelhna hmun chang lova, duhsak a hlawh phak loh lai pawhin thawhrim a thulh ngai lo. Traning-naa an zir bakah a zir belh a, Jim-ah pawh a nawlpuia an tihbak hret a ti belh ngat ngat reng. Hun harsa a tawk mah se a inthladah ve ngai lo. Ei lehin a uluk em em reng a, zu a in lo va, zu leh sa a chen na hek lo. Hmeichhia vawi khat mut puia nuai khat zet hlawh tura thlemna pawh ngaihtuah buai hlek lovin a hnar thei. Chawlh an neih ve tum pawhin ani chu a chawl ve ngai lo. India rama footballer tha ber a ni hial tawh chungin academy zirlai ang maiin a inngaitlawm a, thil thar thiam tumin a bei hram hram thin. A thawhrimna, a taimakna leh a beih fat fatna chuan Pathian malsawmna a tawngbua a, chawimawina tlangchhip a chuangkai ta hial a ni.
“A nunah Pathian lo lian zual deuh deuh zel rawh se” tia a hming Lallianzuala hi a pu C. Dochhunga phuah a ni a, a hming a pu zo hle. A nuapan laia Pastor nih tum a ni bawka tleirawl sual pawh a nei lo. A nuapan lai hian Kristian Naupang Pawl leh YMA Chhangah thuawih lawmman a dawng hial nghe nghe. Pi C. Luri’n ‘Ka chanchin hi ziak dawn ila, i tel ve ang, a phek tinah’ a tih ang mai khan Lianzuala hian a tawngkam tinah Pathian hming a lam tel fo thin a, a kalna apiangah Bible a ak a, hunawl a neih changin a chhiar fo thin bawk.
A nu in, “Ringtu a ni a, khelmual hi a missionary na hmun a ni” a a ti hial a. A nu T. Lalroliani hian thu a uar lova, dawt a sawi hek lo. Inkhel tan hmain a tawngtai a, goal a thun changin Pathian hnenah lawmthu a sawi leh thin. “Goal thun turin engtin nge ball ka lo dawn a, engtin nge dawn thun tura ka lo awm. Engtin nge ka thun dawn tihte hi ka hre lo fo thin. Training naa ka tih dik theih ngai reng reng loh pawh ka ti dik tlat thin. A chhan chu hei hi keima tih a ni lo, Pathian tih, Pathian min pek a ni”, a ti fan thin.
ISL an khel dawn hnaiah chaw nghei tawngtai a nei thin bawk. Professional footballer te ngaih pawimawh em em chu ei leh in a ni a, a hun bi chat chatah an eiin an in thin. Ei leh in thuah an fimkhur em em a, hunbi an ngai pawimawh em em bawk. Chuti chunga chaw lo ngheite chu player dang tan chuan at thlak a ni a, thil tih chi loh tawp a ni. Mah se, Lianzuala tan erawh a mak lo.
“Pathian tan i danglam ngam a nih phawt chuan Pathian hian Pathian danglam a nihzia a hmuhtir thin ang che” ti a. “Lalpa, ka duh ber che min hruaitu atan”, ti tlat thin Lianzuala hi Pathianin a chawi sang zel ang.