Footballer lehkhathiam zual 10

Footballer lehkhathiam zual 10
Professional footballer langsar chinte hausak dan kan hre tlangpui a, an lehkhathiam leh thiam loh lam erawh kan hre thuk lo mai thei a; thenkhat chu mawlmang ve tak tak, football chu lo thiam lo hlauh se la gang member ni mai mai turte pawh an kat nukin a hriat a, chutih laiin football pawh khel lo se eizawnna leh mi hriat hlawh kawnga ngaihtuahawm loh tak tak tur an awm ve bawk.
Footballer tam tak hi retheihna thuk tak atanga insiamhausate an ni hlawm a – Gabriel Jesus, Luis Suarez leh Jamie Vardy han tih angte pawh hi hun khirh tak paltlanga khawvel hriat rawn hlawh chho tate zinga a langsar thenkhat an ni.
Tarlan tak angin, footballer thenkhat chu graduate val, University degree hum chunga inkhelte an ni a, football khel chunga lehkha zirte pawh an ni nawk hlawm!
Khawvela footballer lehkhathiam zual 10-te thlirho teh ang.
10. Giorgio Chiellini
Kum 2010 khan he Italian centre-back hian University of Turin atangin Economics leh Commerce subject-ah Bachelor’s Degree a la ngat!
Kum 2017 khan inkhel chung vekin Chiellini hian Commerce and Economics-ah tho Master’s degree a zo leh a, khawvela footballer lehkhathiamberte zinga mi a ni.
9. Shaka Hislop
English mihang goalkeeper hlui Hislop hian Howard University-ah college soccer khel turin scholarship a hmu a, Mechanical Engineering-ah degree a la. Football a chawlhsan hnuin ESPN FC/ESPN UK-ah commentator a ni zui nghe nghe.
8. Andres Iniesta
Barcelona star hlui hian Biology degree bakah Sports Science atangin degree a hlawhchhuak bawk. Footballer pawh ni lo mah se a tlatna muala ngaih-tuahawm loh ve tak tur Spaniard hian Sports Science-a a thiamnate hi a la hmangtangkai ngei tura ngaih a ni a, European giant boss la ni chho tura ngaih a ni.
7. Frank Lampard
Chelsea manager hlui hi ngaihsan hlawh tak Brentwood School chhuak niin, he school-ah hian 11GCSEs a scrore pha a, a awmzia diktak hre chiah lo mah ila mark hmu tha tak niin a lang!
Premier League medal awrh tun chungin Latin tawng zirna behchhanin degree a dawng bawk.
6. Andrey Arshavin
Arsenal-a career hlawhtling tak hmangliam Andrey Arshavin hi kum 2000 bawr chho kha a vanglai niin, club level-a a hlawhtlinna chuan Russian national team-ah pawh huhang a neihlen phah a, captain banhren hial a hreng pha a; football piahlama a khawsak dan chuan hriat a hlawh lem lo thung.
Arshavin khan fashion designing-ah Master’s Degree a lo sualchhuak reng hi a lo ni a; football a chawlhsan hnuah Russia rama designer larberte zinga pakhat a ni zui thei!
5. Vincent Kompany
Manchester City legend zinga ropui ber pawl Vincent Kompany hian kum 2008-a Etihad club a zawm hnu khan Premier League club tan thawh-hlawkin, European powerhouse dinhmuna City din chhoh theihna kawngah zahkai ber pawl niin, a hmel han en thuak kha chuan football bak ngaihtuah nei hmel a pu lo mai thei a, mahse, a ni miah lo!
Belgium captain hlui hian football pet pah reng chung khan Alliance Manchester Business School-ah kum 2013 atanga 2017 chhung khan a lo inziaklut reng chu lo niin, dinhmun sang taka City chawikang chung khan hlawhtling takin Business Administration a lo zir reng!
4. Glen Johnson
Liverpool right-back hlui hian kum 2012 daih tawh khan Mathematics subject-ah degree lo hlawhchhuak reng chuan!
Mi tam zawkin subject harsaa an ngaih ngei maia degree a neih hnua an kawmnaah Johnson hian college exam zo fel thei turin nitin darkar hnih lehkha a lo zir reng thin tih a sawi-chhuak a, a tan chuan inkhelh ban inbualfai hnua night club lama hun hman mai mai a lo rem ve lo a lo ni!
3. Juan Mata
Spain midfielder Juan Mata hi mite’n an dahsan reng thinna chu theihlohna hmun nia ngaih atang pawha ball tha siamchhuaka team tana kawng a hawnchawp thei leh an tumpuite box chhunga a passing dik leh pui lutuk thin kha a ni.
United right-winger awm tawh zinga fans duh hlawh berte zinga pakhat Mata hi football player zinga lehkha thiamber pawl a lo ni reng a, subject pahnih Sports Science leh Finance-ah degree a lo kawl reng a; mithiam leh mifing ta na na na chuan social media lamah pawh mite hlawkpui tur thu leh hla a ngah a, blog lar tak ‘JuanMata8′ tih chuan tlawh leh ngaihsan a hlawh hle a ni.
2. Socrates
He Brazilian superstar hi ‘Doctor Socrates’ tia sawi thin kha a ni ve reng reng a; infiamna a chawlhsan hmain Medicine-ah a doctorate hman!
Kum 1989-a professional football a chawlhsan hnu khan doctor hnate a han thawk zui leh lawp lawp a! Tah mai chuan a zirkawng a tawp lo a, medical doctor a nih hnu hian Philosophy subject-ah doctoral degree a la zui leh thei ngat a ni!
1. Edwin Van der Sar
He legendary Manchester United shot-stopper hi ban pahnih inkara a theihna chungchuang tak khan khelmual pawn lama a thiamna a hliah deuhte pawh a ni mai thei a, International Sports Management-a Bachelor’s Degree a lak leh he course kaltlang thoa Master’s Degree a zawh zui leh chungchang hian sawi a hlawh zen zen lo.
He Dutchman hian Ajax leh Manchester United thuam inbel chungin football-a chawimawina hrang hrang a khum kim hle a, mahse, zirna lama mi thiam tak a nihna hian infiamna huang ziah leh sawina mualah thurchhuah a hlawh lo fo a ni.
Inkhelh a bansan hnuah Van der Sar hian kum 2016 atang khan a club hlui Dutch giants Ajax-ah CEO hnate a han chelh chho ngar ngar a; chumi hmain kum 2012 atanga 2016 chhung khan he club-ah tho hian Marketing Director hna a chelh bawk.