Footballer upa ber

On Oct 21, 2025 10 0

Footballer upa ber
Kum 40 pelh hnuah football la khel zak zak hi sawi tur an tam lo kawp mai. England goalkeeper Peter Shilton khan 1990 FIFA World Cup-ah kum 40 mi niin England tan a la khel a, club football pawh 1997 thleng a la khel a, kum 47 mi niin, third division club Leyton Orient tan a season tawpna a hmang ta a ni. Mahse, footballer upa ber a la ni chuang lo.
English winger, Stanley Matthews-a’n 1965-a inkhelh a chawlhsan khan kum 50 mi a ni a, Stoke City-ah a football hun hnuhnung a hmang. Ani pawh footballer upa ber a la ni ta chuang lo. Kum 40 vel bawr an nih pawha la inkhel zak zak hi top footballer zingah sawi tur an awm zeuh zeuh- Zlatan Ibrahimovic, Gianluigi Buffon, Javier Zanetti, Francesco Totti te pawh chung zingah chuan an tel.
Football lama benghawng deuh chuan Kazuyoshi Miura hming hi kan hre tawh mai thei ‘King Kazu’ an ti mai thin, kum 58 mi a nih thlengin club football a khel a, Japanese fourth-tier Atletico Suzuka Club tan a khel. Mahse, ani pawh hi footballer upa ber a la ni ta chuang lo.
Tichuan le, Mario Kempes ten Argentina tana World Cup 1978 trophy an dawn hma kum hniha football khel tan tawh a, vawiin thlenga club football la khel a awm. A hming chu Robert Carmona a ni. Kum 63 a ni tawh. Guinness World Records-in kawvela active footballer upa berah a puang.
Uruguay a piang, Robert Carmona ian 1976 khan kum 14 mi niin football a khel tan a, Club Deportivo Puey-ah bul a tan. Chuta tang chuan vawiin thlengin active footballer a la ni ta reng a, ram hrang hrangah khel kualin, club 50 tan a inkhel tawh a, Uruguay, USA, Italy, Spain leh Canada-ah te a lo khel kual zak zak tawh.
2025 season-ah Club LIFFA tan khel lehin, he club hi AUF hnuaia First Division D Uruguayan Championship-ah a la tal ta zak zak a, tunah hian Club Estudiantes El Colla, Rosario league of Colonia, National Campionship of OFI-a season hnih khel tura sawmna a dawng leh tawh bawk.
Creative midfielder niin, ke veilam hmangthiam a ni a, match 2,200 vel khel tawhin, a football career-ah goal 55 a khung tawh bawk. Kumin hi a 50th season a ni ta reng mai!