Forest Bill passed tak kha…
Manipur-a tharum thawhna boruakin Parliament Monsoon session, rorel hlei thei lova ni nga zet a bawh buai hnuah, nimin khan Lok Sabha chuan, sawisel hlawh ve tak bill, “The Forest (Conservation) Amendment Bill, 2023” chu a pawm (passed) ta a. He bill hi a bikin India hmarchhak state-te tan chuan Bill lawmawm loh tak a ni awm e.
Nikum June thlaa mipui hmuh theiha public domain-a he bill draft copy chhawpchhuah a nih khan, India hmarchhak state atangin duhlohna thawm a ri chhuak nghal a. He bill-in a ken pakhat chu, International Borders te, Line of Actual Control leh Line of Control atanga Km 100-in a huam chin chhungah ram venhimna atana pawimawh “security related infrastructure” chu khawiah pawh a tul anga din theihna dan a tel a.
He bill amendment hian thil tha tak tak dang keng bawk mah se, northeast state-te hi state tereuh te te kan ni a, international border thui tak tak nei kan nih vek avangin, international border atanga kilometre 100 huam chhung hian state pumpui deuhthaw a huap zel avangin, state chhunga forest area a ni emaw, forest awm lohna a ni emaw, thu neihna abar kan nei tawh dawn lo tihna niawm tak a ni.
Mizoram phei hi chu chhak leh thlang lamah Myanmar leh Bangladeuh-in min karcheh a. Mizoram dung leh vang len zawng hi a vang lam km 115, a dung km 285 a ni mai a. Myanmar nen kan inrina border atanga teha ram chhung km 100-a thui leh, Bangladesh border atanga teha ram chhung Km 100-a thui han teh chuan, Mizoram khawi hmunah pawh Dan angin Central sawrkar chuan a duhna hmun apiangah ramngaw thalai pawh thiatin “security related infrastructure” a dah hmak hmak thei mai zel dawn tihna a ni. Hei hian duhthala Centre-in state ram chhunga thuneihna a rawn leklam theihna a nih avangin harsatna thlentu lian tak a la ni theiin a lang.
He bill hi introduced a nih a, Select Committee-a refer daih a nih chungchangah pawh, member 31-ah member 18 chu BJP MP an ni a, bill hi a nih ang angin thawn kir leh a ni, sawiseltu pawl chuan an ti a; standing committee on science, technology, environment and forest-ah refer zawk tur a ni hrim hrim, an ti bawk.
He forest dan hi a hming “Van (Sanrakshan Evam Samvardhan) Adhiniyam” tia dah pawhin sawisel a hlawh bawk a; Hindi tawng hmang lote palzutna a ni, an ti. He bill pawm tak hian sawisel a hlawh viau a ni.