Forest dan do zawnga vote thlak ngam loah RS MP puh

India hmarchhak tlangmite tana him lo dan, Parliament-a pass dawnin Mizoram Rajya Sabha MP chu he dan do zawnga vote thlak ngam loin a haw niin ZPM Thalai chuan an sawi.
ZPM Thalai Hqrs. thuchhuak chuan, Parliament Monsoon Session neih mekah August 3 khan Mizo mipui leh India hmarchhak tlangmite duh loh em em, Forest Conservation (Amendment) Bill 2023 sawi hoa vote lak a ni a, Mizoram mipui aiawha ding Pu K Vanlalvena chu vote thlak ngam loin vote thlak dawn tepah a haw tih a sawi.
‘Rajya Sabha MP-in BJP thil tum do zawnga vote a thlak ngam loh dan atang hian MNF leh BJP inzawmna thuk zia leh ngheh zia chu chiang taka tarlanin a awmah kan ngai a. Manipur-a Zofate nekcheptu leh India ram Kristian-te nekcheptu BJP sawrkarah hian MNF hian engnge beisei a la neih, tih hi kan zawhna a ni,’ a ti.
Mizo mipui aiawha ding tura ngaihin bill duh lohna pawh lantir ngam loa a tlanchhe ta mai chu beidawnthlak an tih thu ZPM Thalai hian sawiin, ‘Hruaitu dawihzep hruaina hnuaiah leh ram leh hnam himna tura policy nei lo party kaihhruainaah chuan kan MP huaisen tak thin pawh khan awmzia a nei ta lo tih hi kan hmuh dan a ni a; hei hian state khata hruaitu lu ber leh party policy pawimawh zia a tarlang chiang hlein kan hria,’ tiin, kumin inthlanpuiah pawh candidate mai bakah hruaitu lu ber leh policy en chunga vote thlak turin Zoram mipui an ngen tih a sawi a ni.