Forest dan thar dodal turin sawrkar kaiza ven kan inhuam – Lalduhoma
Forest dan thar dodal turin
sawrkar kaiza ven kan inhuam
– Lalduhoma
India sawrkarin state-in ramngaw a humhalhna dan chu thiat a, dan thar siam a tumna dodal turin Mizoram sawrkar leh MP ten hma hruai se, mipuiin an kaiza veng ang u, tiin ZPM leader Lalduhoma chuan a ngen.
ZPM leader hian thuchah a tichhuak a. Forest (Conservation) Act 1980 thlak a, sawrkar laipuiin awlsam taka state mal chhunga ramngaw thiata hmunhma an khuar theihna tur dan neih theihna’n, ‘Forest Conservation (Amendment) Bill 2023’ chu Parliament Session neih meka pass tum a ni tih a sawi.
Bill thar putluh tum zirchiang tur hian sawrkar laipui chuan Joint Parliamentary Committee (JPC) a din ve bawk a, sawiselna leh tidanglam tura rawtna 1300 chuang a lut chungin, engmah tidanglam loin draft bill chu a nih anga anga pawmpui a ni a, hei vang hian JPC member (MP rual) a tel, opposition party mi 5 chuan draft bill an pawmpui ve loh thu ziakin an thehlut ve nghal tih a sawi a ni.
Bill hian ‘Preamble’ a nei thar a. Parliament-a pawm a nih a, dan hi hman tura duanzui a nih chuan, ‘Forest (Conservation) Act’ tih thin chu ‘Van (Sanrakshan Evam Samvardhan) Adhiniyan’ tia thlak a ni dawn a. Forest Conservation Act (FCA) 1980-in ramngaw a humhalhna ber Section 2-na chu tidanglamin, Section thar pahnih (1A leh 3C) belh a ni dawn tih a sawi.
“He Bill hi international boundary nei hmarchhak state 5 – Manipur, Nagaland, Tripura, Meghalaya leh Mizoram tan chuan ‘Bill sakei’ a tling. He Bill hmang hian kan ram leilung pumpuiah sawrkar laipuiin thuneihna min chhuhsak a tum mek a. Inhumhalh bikna dan hrang hrang kan neihte chu a hranpaa min hlihsak siloin, he Bill hmang hian thiam takin, automatic-in min hlihsak dawn tihna a ni. Kan sawrkar leh MP-te hian hma hruai se, mipuiin an kaiza veng ila, theihtawp chhuaha dodal turin ka sawm a ni,” Lalduhoma hian a ti.
Forest Conservation (Amendment) Bill 2023 hi pawm a nih a, dan thar hi hman a nih a, min nghawng theihna ZPM leader sawi dan:
# International boundary atanga boruak mela teha km.100 huamchhunga hman tur a ni a. Mizoram chu a pumin min huap deuhthaw dawn tihna a ni.
# Km 100 bialin a huamchin chhungah chuan FCA 1980 hmangin ramngaw a humhalh theih dawn tawh loa. Sawrkar laipuiin ram venhimna leh vantlang mamawh atan a duhna lai laiah hmunhma a rawn khuar thei tawh dawn. Sipai hmunpui, rel kawng leh kawngpui, industry lianpui puite dinin, inchimralna hmanraw tangkai tak a ni dawn.
# Chutianga ram venhimna emaw development emaw chhuanlama hmanga bu an rawn khuar dawn chuan, tunhma angin forest clearance an lak a ngai tawh dawn loa, awlsam takin ram an suasam thei tawh dawn.
# Ramngaw thiah a nih dawn reng rengin, hmundanga a aiawh tur ramngaw leh a kaihhnawih ruahman lehna atan, compensatory afforestation atan sum tam tak an chawi a ngai thin a. Mizoramah pawh Compensatory Afforestation Fund Management and Planning Authority a awm. He Bill hi pass a nih chuan engmah chawi tawh loin, a thlawnin an nei thei tawh ang.
# The ST and Other Forest Dwellers (Recognition of Forest Rights) Act 2006 in ramngaw tlawhchhana eizawngtu tribal-te min humhalh tha hle a. He dan pawh hian min hum zo tawh dawn lo.
# BEFR 1873 Section 7-na chuan ram leilung fa nilote chuan kan ramah inhmun lo ram leh ram hausakna an neih ve a phal loa, state sawrkarin phalna a pekte chauh lo chuan kan ramah ram neitu nihna an nei thiang ve lo. He Bill hi hman a nih chuan, Vai hoin kan ramah phalna la hmasa loin industry lian pui puite an din thei tawh ang. Harsatna kan lo siamsak chuan BEFR 1873 chawp hian min paihsak loang tih a sawi theih loh. Vai danna dan (ILR) phei hi chu hnawk an tihna a rei tawh a.
# India Constitution Artcile 371G chuan Mizoten ram neitu nihna leh neitu nihna hlanchhawng theitu nihna min pe a. Hemi kalh zawngin Parliament-in dan a siam chuan, Mizoram Legislative Assembly-in rem a tihpuina resolution a pass a nih ngawt loh chuan, hman a ni ve loang, tih a ni. Tuna Bill an putluh hian hei pawh hi a rawn kalh nghal der a. Kan special provision hmang hian he Bill hi kan state-a hmang ve lo turin kan nawr thei angem, tih pawh hi zawhna chhan awl lo tak a ni ta.