Formula 1-in sprint tlanna tur puang

On Dec 9, 2023 11 0

Tun season liamta ang bawk khan 2024 Formula 1 season-ah pawh grand prix tlan hma ni chiahah aite chhinna leh point keng ve tho ni bawk ‘sprint race’ an tih kha hmun thenkhatah an zeptel leh dawn a, chumi atana thlan bik pawh F1 chuan puang fel tawhin, kum tharah hian China, Miami, Austria, Austin, Sao Paulo leh Qatar-te chu sprint tlanna tura tihfel a ni.
Thawhlehni khan Formula One chuan sprint race list hi tichhuakin, a kalphung her-danglam hlek an ngaihtuah mek tih an tarlang tel a; an ruahman chhin dan chuan sprint race atana qualifying hi Zir-tawpniah an tlan ang a, Inrinniah race rei lo zawk a awm thei ang a, grand prix qualifying-in a zui leh ang tih chu an pawm phawt dan a ni a, thil thlakdanglam tur dang sprint grid chungchang vel pawh la ngaihtuah mek a ni.
Kumthar January thla hian F1, governing body FIA leh cham-pionship-a inlan tur team 10 telna F1 Commission an thukhawm ang a, sprint race behbawma tihdanglam turte hi an sawiho dawn a ni.
F1 president Stefano Do-menicali chuan kum 2021-a sprint race an tih tan atang khan TV lamah F1 intlansiak thlirtu an pung tih sawiin, fans tan tlan-kawngah hlimpui tur a tam belh a, chu chuan tualzal titi leh digital platform lamah khel tur a tihtam belhchhah tih sawiin, kum tharah pawh sprint race hlimawm an beisei leh tih a sawi.
FIA president Mohammed Ben Sulayem pawhin lo tuihnih ve nghalin, motorsport tana tha ber tur ngaihtuahin theihtawp an chhuah zel tih a sawi a, sprint format fuh zawk dinchhuak zel turin F1 leh team-te nen pawh an thawkho tha niin a tarlang ve bawk.
Nakkuma sprint hmasaber hi Chinese Grand Prix (April 19-21)-ah behtir niin, he Shanghai race hi khawvel tuamtu hripui hnu lama F1 calendar-a a lan leh vawikhatna niin, kumin hian an dah zet a, China rama covid zung an la hmehmih loh avang khan an paih leh ta a ni.
Sprint race vawihnihna chu May 3-5 chhunga tlan tur Miami lamin a thleng dawn a, he khawpuia sprint event an nghah vawikhatna tur a ni nghe nghe.
Race dang palite chu a hmaa an lo tlan tawhna a ni. Chu’ngte chu Austria (June 28-30), US Grand Prix (October 18-20), Sao Paulo Grand Prix (November 1-3) leh season kharna Qatar (November 29 – December 1).