Tualchhung inelna hautak bera ngaih English Premier League ah Nottingham Forrest hi chetha hluai tura beisei ngam an ni lo. Top 3 huang meuh luah tur phei chuan zawlnei der tan pawh puan ngam chi ni lo tluk a ni. Tlak hniam tuma tan khawh tur zinga ngaih ni mah se game 20 an khelh tlin meuh chuan pathumnaah hial an awm a. An chung chiaha awm Arsenal nen an point hmuh zat a la intluk cheu bawk. Mualneitu Wolves an sawp hnuin Forrest a hring mawi leh zual.
Thawhtan zan khan Nottingham Forrest hi table hnuai lama awm mek Wolves hmachhawn turin Molineux Stadium-ah an lenglut. An len luhna mualah an ngampa hle a, Forrest-ah Chinghnia an ngampa hlawl si lova, Forrest hian 3-0 ngawtin hnehna an chang.
Rin phak baka chetha leh beisei phak baka tlo Nottingham Forrest hian Wolves lakah bul an tan tha hle. Morgan Gibbs-White chuan inkhel tan atanga minute 7-na lekah hmahruaina goal a thun nghal. Hma takah goal an thun vangin an phur a, inrintawkna sang zawk nen inlan chhunzawmin, chawlhlawk dawn hnaih minute 44-naah Chris Wood chuan an goal hnihna a thun zui leh a, si hniha hmahruai chungin chawlhlawk an hmang.
Chawlhlawk hnu lamah Wolves hi an si phurh sut ngei tum viau mah se Ramngaw-ah ei tur an hmu thei lo. Hun tawp dawnah Forrest a hrin mawi leh zual nan Taiwo Awoniyi chuan minute 90’+4-naah an goal thumna a thun a, an chakna a nem nghet. Forrerst hian khelh 20 atanga point 40 hmuin pathumnaah an awm mek. Forrest in hma an sawn zel laiin Wolves hian 17-na an luah chhunzawm thung.
Forrest a hringmawi zual zel
Get real time updates directly on you device, subscribe now.
Prev Post
Next Post