Forrest in tlawm an pumpelh

Pathianni zana English Premier League inkhel awmchhunah Nottingham Forrest chuan tlem zawk ni chungin tlawm an pumpelh a. An mikhual Brentford nen 1-1 in an inhnehtawk.
City Ground-ah mualneitu Nottingham Forrest leh Brentford te an inhnehtawk viau a, inkhel hmuhnawm takah goal a lut har hle. Goal thun tumin innawr tawn nasa viau mah se chawlhlawk hmain goal thun thei an awm lova, inhnehtawk chungin chawlhlawk an hmang phawt.
Chawlhlawk hnu lamah mualneitu Nottingham Forrest an chesual thuai a, minute 56-na lekah Moussa Niakhate hnawhchhuah a ni. An mualah tlem zawk an nih hnu lawkah dinhmun chhe leh zualah an ding a, goal an chhuah zui thuai. Brentford tan hian minute 58-naah Christian Nørgaard chuan hmahruaina goal a thun. Tam zawk an nih bakah goal thun hmasa zawk an nih vangin Brentford in hnehna chan theihna remchang an nei a. An chunga awm mek Forrest lehpelh ngei an tum hle.
Tlem zawk ni chunga goal an chhuah hnuin Forrest an insiamtha a, goal thunin an si phurh an sut thuai. Goal an chhuah atanga minute ruk hnu lekah Nicolás Domínguez chuan goal thunin an si phurh a sut. 1-1 a nih hnuin inkhel a hmuhnawm lehzual a, Brentford in hnehna chan ngei tumin tan an khawh a. Forrest in tlawm pumpelh hram turin tan an khawh ve bawk. Hun tawp thlengin goal dang a luh belh lova, hun rei tak chhung tlem zawk ni chungin Nottingham Forrest in tlawm an pumpelh ta a ni.