Lallianzuala Chhangte
-- Advertisement --
India rama professional footballer-te intelkhawmna pawl Football Players’ Association of India (FPAI) chuan tunhnai khan Goa lamah FPAI Indian Football Awards 2024 an semchhuak a, nikuma lama FPAI Men’s Player of the Year award lo dawng tawh Mumbai City FC player Lallianzuala Chhangte bawk kha FPAI Men’s Player of the Year 2023/24 award dawng turin an thlang nawn leh a, kum zawnin Indian football-a chawimawina hlu tak a dawng a ni satliah mai lo a, Mizote zinga he award tum hnih dawng thei hmasaber leh awmchhun niin, kum 2015/16 season khan Jeje Lalpekhlua’n a lo dawng ve tawh bawk.
AIFF Player of the year award dawngtu pawh an puang leh hnai tawh a, hei pawh hi Lunglei tlangval hian a dawn ngei a rinawm viau a ni.
LZ Chhangte hian Indian Super League (ISL) season liamtaah khan Mumbai City FC a champion-pui a, ISL Cup an lakna kawngah pawh thawhhlawkin, India captain chawl ta Sunil Chhetri tih loha kum zawna FPAI Men’s Player of the Year award dawng thei awmchhun a ni.
Mumbai City FC winger Lallianzuala Chhangte hian season liamta khan inelna hrang hrangah Islanders tan game 33 atangin goal 11 a thun tling a, ISL 2023-24 season tawp dawn hnaih lamah khan a chetha chho zual a, semi-final first-leg hun tawp hnaih lamah goal hnih khungin Mumbai City kha sihnih faiin hma a hruaipui a, final an luhna kawngah rahbi pawimawh tuktu a ni.
ISL 2023-24 bikah khan goal 16-ah inrawlhna nei tlingin, national team lamah Qatar laka an tlawm tum khan India goal neihchhun khungtu a ni bawk.
Odisha FC winger Isak Vanlalruatfela Ralte pawh FPAI Indian football award dawngtu zingah telin, best young player award 2023-24 hlan a ni a, a team-mate Ahmed Jahouh chu best foreign player atan thlan a ni ve bawk.
Kum 23 mi Isaka hian ISL 2023-24 khelh zawh takah khan goal li thunin assist vawithum a nei tling a; Sergio Lobera hnuaiah Kalinga Warriors tan player pawimawh leh langsar a tling pha.
Feet 5 leh inchi 8-a sang 5 Isak Ralte hian Redstar Football Academy lamah a Youth career bul tanin, kum 2017-2018 chhung khan Bengaluru thuam a inbel a; kum 2018-2020 lamah chuan Mizoram lamah lo chuangchhuakin Aizawl FC tan game 19-ah goal thum a khung a; kum 2020 atangin Odisha lamah a insawn a, he thu buatsaih lai thleng hian match 39 a khelh tawh atangin goal sarih a tilut tling tawh.
Bawngkawn LC tana NECS Cup lo khel tawh leh Electric Veng FC player hlui ni bawk hian kum 2018 November ni 16 khan Aizawl FC thuam inbel chungin a professional debut-ah Chennai City FC a hmachhawn a, 1-2-a Mizo club tlawmna inkhelah khan second half tir lam minute 64-ah khelmual a lut a; professional a luhchilh hnuah hmasawn zawngin a kal chho ta zel a ni.
June ni 24, 2020 khan Indian Super League club Odisha FC a zawm a, November ni 30, 2021 khan 6-4 tehrenga SC East Bengal an sawp tumin a league goal hmasaber a thun nghe nghe.
Kumin March ni 7 khan a international career pawh intan fel chiahin, head coach ban tak Igor Štimac khan World Cup qualifiers khel tur national squad la thlitfim leh tur member 35 a thlanchhuah zingah telhin, tunah India rama award ngaihhlut hlawh zinga mi a dawng ta hial a ni.
FPAI awards-ah hian FC Goa head coach Manolo Marquez chu Coach of the Year prize dawngtu niin, Dalima Chhibber (Kickstart FC) kutah Women’s Player of the Year 2023/24 award hlan a ni a; Odisha FC player Lynda Kom Serto chuan Women’s Young Player of the Year lawmman a dawng thung.
FPAI award dawngtute
Men’s Player of the Year:
Lallianzuala Chhangte
Women’s Player of the Year:
Dalima Chibber
Men’s Young Player of the Year:
Isak Vanlalruatfela
Women’s Young Player of the Year:
Lynda Kom
Coach of the Year:
Manolo Marquez