France-ah far-right National Rally ten thuneihna chan hmel

France far-right te chuan parliamentary election first round neihah dinhmun tha ber changin France politics ah lianta berin thuneihna chang mai thei dinhmunah an ding ta a .
Marine Le Pen anti-immigration National Rally (RN) thlawptute chu an phur hle a. Marine Le Pen chuan “macronist bloc te nuaichimihin an awm ta” tiin a sawi zui bawk.
RN te hian vote 33.1% hmu in left-wing alliance te chuan 28% an hmu a, Macron party te chuan 20.76% chauh an hmu a ni.
“French mipui ten min vote tling a nih chuan French mi tinte tana prime minister nih ka tum a ni” tiin kum 28 a upa RN party leader Jordan Bardella chuan a sawi.
Tun hma inthlanah far-right ten French parliamentary election first round ah chakna an la chang ngai reng reng lo va, tuna chakna an chang hi chhinchhiahtlak a ni tiin veteran commentator Alain Duhamel chuan a sawi.
Marine Le Pen leh Jordan Bardella te chuan National Assembly seat 577 awmah majority seat 289 lak an duh ber a ni a. Mahse, Pathianni a second round neih turah tuna a lan dan chuan majority chu an nei pha lo deuh tura ngaih a ni.
Absolute majority an nei thei lo a nih chuan France chuan hung parliament a nei dawn tihna niin RN te chuan an duh ang diak diakin immigration, tax cuts leh law and order ah an ruahmanna te an kalpui vek thei dawn lo tura ngaih a ni.
France inthlan hi neih hun pawh a la ni lo va. Mahse, Emmanuel Macron chuan RN tena European election a chakna an chan hnuah ‘tihmakmawh a ni’ tiin inthlan a ko a ni.
Macron chuan a gamble a ni ber a, a vanduai phah dawn ta anga ngaih niin 10.6 million French khua leh tui te chuan RN an vote a, conservative Republicans thenkhatte pawhin an thlawp a ni.
Vote tla pawh 66.7% lai niin kum 1997 hnua parliamentary first round-ah vote tlak that ber a ni bawk a, inthlan puan atanga inthlan inkar chhungah kar thum tha zen zawn chauh hun a awm bawk.
First round hnuah hian National Rally MP 37 te chuan vote awm zawng zawng zahve aia tam hmuin chaka puan an ni sa a, left-wing New Popular Front atang pawhin 32 chu chaka puan an ni bawk.
Left-wing voter thahnem tak chu Paris-a Place de la Republique ah RN te hlawhtlinna avanga an lawmlohna leh thinrimna lantirin an pungkhawm a ni.
President Macron chuan second round-ah republican alliance ten democratic takin lungruala chet kan lak a ngai a ni tiin a sawi a.
Prime Minister Gabriel Attal chaun, “Vote khat pawh National Rally te lamah a kal tawh tur a ni lo. Kan tum ber chu National Rally tena absolute majority an neih dal a ni” tiin a sawi.
Jean-Luc Melenchon, France Unbowed (LFI) thung chuan “Thil chiang tak chu Attal chu prime minister a ni rei tawh dawn lo” a ti thung a. LFI te hi New Popular Front ah pawh left-wing radical ber anga ngaih an ni.
National Rally te hi French society a extreme-right atanga irhchhuak te niin charismatic leader la thalai tak neiin French prime minister ni thei tura ngaih a ni a. NR te hian classroom a mobile phone hman khap tem energy a tax tihhniam te, foreigners te benefits paihsak te pawh campaign auhlaa an neih a ni.
“Kawtthler a him loh chuan mipui an hlim thei lo” tiin voter Patrick chuan a sawi a, RN te chakna ber ber chu Paris khawpuiah a ni tlat a ti bawk a.
“Hnehna kan chan hmel” tiin Eric Ciotti, conservative leader, Republican party atanga phela National Rally te nena tangho chuan a sawi bawk a ni.
RN te chuan absolute majority pawh nei thei an ni a, mahse, a landan chuan hung parliament awm hmelin RN te chuan seat tam ber an la ang a. New Popular Front te seat share pawh a pung hle tura ngaih a ni bawk.
Pathianni khan second-round neih leh tur niin tun inthlanah hi party pathum te inbeihna a ni ber a. Prime Minister Attal chuan constituency tam takah an party candidate te chuan RN te chakna tur an dang dawn a ni tiin a sawi a. Far-right tena project chhe tak tak hmanga ram rorelna an duh anga an lekkawh dan hi kan moral responsibility a ni tiin a sawi bawk.