France an chak zel

Nilai zana international friendly match-ah Euro 2024 khel tura tling chiang tawh pahnih; France leh Scotland an inhmachhawn a, France in 4-1 ngawtin hnehna an chang a, an chak tluang zel. Inkhel dangah manager thar hnuaia beiseina sang tak nei Germany chu Mexico nen an inhnehtawk thung.
France leh Scotland te hi Decathlon Arena – Stade Pierre-Mauroy-ah an inhmachhawn a, goal thun hmasa zawk Scotland an pawr zuih. Scotland tan hian minute 11-na lekah Billy Gilmour chuan hmahruaina goal a thun. Hma taka goal an thun vangin pawr viau mah se an pawr rei lova, si phur zawkah an tang let ta thuai thung. Mualneitu France tan hian defender Benjamin Pavard chuan minute 16-naah goal thunin an si phurh a sut a. Pavard vek hian minute 24-naah hma an hruai letna goal a thun zui leh nghal zat. Hma an hruai let hnuin minute 41-naah Kylian Mbappé chuan an goal thumna a thun zui leh bawk. Chawlhlawk hmaa goal thum an thun bak hi minute 70-naa Kingsley Coman thun a ni ve thung.
Thawhleh zana inkhel dangah Mexico leh an mikhual Germany te chu 2-2 in an inhnehtawk.