France leh Colombia an tlang ve leh

France leh Colombia an tlang ve leh
August 8, Thawhlehni khan Women’s World Cup last 16 khelh chhunzawm a ni a, France leh Colombia ten hnehna changin quarter-final an lut ve leh. Colombia hian England an hmachhawn zui leh ang.
France hian Hindmarsh Stadium, Australia-ah Morocco an hmachhawn a, sili faiin hnehna an chang. France hian Morocco lakah bul an tan tha viau a, minute 23 chhungin goal thum an thun hman der. Chawlhlawk hmaa goal thum an thun bakah chawlhlawk hnu lamah goal khat an thun leh bawk.
France tan hian inkhel tan atanga minute 15-na lekah Kadidiatou Diani chuan hmahruaina goal a thun a. Hmahruaina goal an thun atang minute nga hnu lekah Kenza Dali chuan an goal hnihna a thun belh a. Minute 23-na lekah Eugénie Le Sommer chuan an goal thumna a thun zui leh zat bawk. France goal thumna thuntu Le Sommer hian minute 70-naah France goal lina thunin an chakna a nem nghet a, si li faia hnehna changin quarter-final an lut zui ta a ni.
Thawhlehnia last 16 inkhel dangah Comlombia chuan an khingpui Jamaica chu minute 51-naah Catalina Usme goal thun hmangin an hneh a. Harsa taka hnehna changin quarter-final an lut ve bawk.