France Under-21s boss Henry a bang

France Under-21s boss Henry a bang
Kum 2025 thleng contract la nei mah se Arsenal leh Barcelona striker hlui Thierry Henry chuan 2024 Olympics silver medal a lakpui hnu lawkah France Under-21s manager a nihna a bansan.
Kum 47 mi hian nikum mai khan kum hnih daih tur contract ziak mah se Paris Games final-ah khan Spain lakah a team enkawl chu extra time an khelh hnuah 5-3-in an tlawm a, nakkum Slovakia rama European Under-21 Championship khelh hmabak ni mah se a hna chelhlai tawpsan turin thutlukna a siam ta a ni.
Banna thuchhuah a siamah Henry chuan, “Ram tan Olympic Games-a silver medal lak kha ka hringnuna ka chhuan berte zinga pakhat a ni.
“Tawnhriat ropui tak min siamsaktu Federation, players, staff leh supporters chungah ka lawm takzet a ni,” a ti.
France Football Federation pawhin thuchhuah siam ve nghalin, tihhlawhtlin tur hmachhawp a insiam laia bang tura Henry thutlukna siam ta mai chu pawi an tih thu an tarlang.
France under-21 team a enkawl chhungin match rukah vawili Henry khan hnehna a chanpui a; overage player pahnih, striker ve ve Alexandre Lacazette leh Jean-Philippe Mateta telna Olympic team bik kha game 11-ah vawiriat a chakpui bawk.
Kumin mipa Olympic football-ah khan USA, Guinea leh New Zealand hnehin France kha an group-a sang ber niin, knockout stage-ah Argentina leh Egypt an hneh leh a, final-ah Spain an ngam ta lo a ni.
Football a khelh laiin Henry hian ram tan match 123-ah goal 51 a thun tling.