Frankfurt muala chak zo lo Bayern

A game hnuhnung vawiriata goal 10 khung tling Omar Marmoush chuan Pathianni zana Eintracht Frankfurt tlawm tur chhan lehin hun pekbelh minute lina a kal mek laia a goal hnihna tihluh hmangin mikhual inthlahrung lo Bayern Munich lakah a team chu 3-3 draw a puitlinpui a; he game-a a goal hmasa zawk hi first half minute 22-a defender Kim Min-Jae goal a thungrulhna a ni.
Minute 35-ah Egypt forward Marmoush bawk hian Hugo Ekitike goal tur siamsak ve lehin, Bundesliga hmahruaitu team lakah Frankfurt-in 2-1-in hma an hruai!
Minute thum a liam leh tihah Dayot Upamecano chuan Munich siphurh sutna goal thun ve lehin, team pahnih hi half time-ah 2-2-in an inhnehtawk phawt.
Second half tir lam minute 53-ah Crystal Palace winger hlui Michael Olise chuan German top-flight kal laia goal khung thei ber ni mek Bayern goal thumna thawh ve lehin, mikhual team hi chak zui mai tura ngaih an nih hman thuak tawh hnuah ropui taka mualneitu team erler thlir tur a awm zui ta a ni.
Manuel Neuer-a dan zawh loh goal thumna hi, tarlan tawh ang khan, hun pekbelha Egypt international Marmoush thun niin, Eintracht Frankfurt tan league-ah a zawnin goal vawinga a khung zawn ta a ni.
He inkhelah hian England captain Harry Kane chuan club tan goala khung zo lo leh tawh a, tun hi a zawna game thum a nil-na ni tawhin, Olise goal tur erawh kha chu a chhawpsak niin, season kal laia assist vawinga a siamchhuah tlinna chiah a nih rualin Bundesliga term kal laia assist ngah ber ani chho nghal.
Kum 31 mi Kane-a buaina belhchhah turin minute 72-ah Frankfurt defender Tuta nena an intawkpalhna lamah a intina a, khel tluan thei loin khelmual a chhuahsan a ngaih phah.
Bayern Munich kha Champions League lamah Aston Villa hneh loa tlawm hlimhlawt niin, boss thar Vincent Kompany hnuaia an chak loh vawikhatna atangin tualchhung league lamah an thochhuak leh nghal a ni.
Frankfurt muala draw result an hlawhchhuah leh tak hnuah Bayern hi inelna hrang hranga an game khelh hnuhnung pathumah an chak zo lo fai vek a, chu mi chinah chuan vawikhat tlawmin draw vawihnih an nei a, Germany a thlen hnua fak hloh chhoh viau Kompany honeymoon period a tawp ta ni berin a lang!
Bundesliga table-ah erawh hma an la hruai zui hram hram a, Pathianni inkhel hmasa lama Heidenheim hnehtu RB Leipzig chuan point-ah an rawn nihrualpui a, goal difference hmangin Bayern hi an chungnung chauh a ni tawh.
Chak se Frankfurt kha a ler luah chho thei tur an nih laiin kum 1999 hnu lama league hmahruaitu an nih leh vawikhatna tur an puitlin zo ta lo a, an match khelh hnuhnung vawingaa tlawm pumpelh vek chungin table-ah pathumna an thut.