French Open mixed doubles final : Skupski & Krawczyk an tlawm

Kumin January thlaa Australian Open final paltlang zo lo tawh Briton Neal Skupski leh American Desirae Krawczyk inkawp chuan French Open mixed doubles final an luh vawikhatnaah hnehna an chang zo lo a, straight sets hmangin Laura Siegemund leh Edouard Roger-Vasselin tangdun an hneh lo.
German Siegemund leh Frenchman Roger-Vasselin thawkdun hian Court Philippe Chatrier ni sensa vawl vawl hnuaiah darkar khat leh minute 40 chhungin 6-4 7-5 hnehna an chang a, an inkawp vawikhatnaah major title an sualchhuak der!
Kum 36 mi Siegemund chuan tournament an khelh dan boruak sawichhuakin, “Last minute tak taka tum chawp chauh kan ni. Singles leh doubles lama ka chhuah ve ve avangin kei phei hi chuan mixed lam hi ka lo tinzawn lo a, mahse, hmingpekluh theih hun tawp thlen hma darkar hnih la awmah Edouard hian message min lo thawn a, ani nena tandun chu ka duh a, tunhma lama la kheldun ngai lo ni mah ila ka hnial thei ta lo a, thutlukna tha tak ni tain ka hria,” a ti.
Final-a chak zo ta lo Skupski leh Krawczyk inkawp khan tum hnih ngawt Wimbledon title la tawhin, kumin January thla pawh khan Australian Open final an lut tih tarlan a ni tawh a, mahse, tunhma lama la tangdun ngai lo Siegemund leh Roger-Vasselinin lakah rinkai zawk ni chungin an tlawm leh ta a ni.