French PM paih thla, kum hnih chhungin PM panga nei dawn

French PM paih thla, kum hnih chhungin PM panga nei dawn
Prime Minister François Bayrou-a chu National Assembly-a a sorkar buknaah rintawk a hlawh zawh tak loh avangin a sorkar a tlu a, France chuan politics-a buaina thar an hmachhawn leh ta.
Bayrou-a hian Thawhtannia vote lakah thlawptu 194 a neih laiin thlawp lotu 364 an awm a, Thawhlehni khan President Emmanuel Macron-a hnenah a bânna a thehlut zui a, a aiawhtu tur ngaihtuah theih a ni zui dawn a. Macron-a pisa chuan hei hi chu ‘nakin deuhvah’ a ti thung.
Prime minister thar tur hi a la chiang lo va, party hrang hrang atangin sawi rik neuh neuh erawh an awm.
France hian kum hnih pawh tling lo chhungin prime pangana an nei dawn ta a, Macron-a’n president term hnihna a chelh chhung hian sorkar mumal a awm hman meuh lo a ni.
Bayrou-a hi a sorkarin leiba a ngah lutuk avanga hnawl a ni deuh ber a. Nipui chhung hian € tluklehdingawn sang 3.4 vel ba an neih titlem tura an che lo a nih chuan France tan hlauhawm lian tak a ni thei tih a sawi a ni.
Kum 2026 budget-ah chuan national holiday pahnih paiha welfare payment leh pension an pek thin tihtawp a tum bawk a, hei hi € tluklehdingawn 44 an hum theihna tura a ruahman a ni a; mahse, a inruahman aia hmain paih thlak a ni ta a ni.
National Assembly-ah hian party mal lian fal an awm loh avangin Bayrou-a hi lehlam lehlamah thlawptu dap thei a ni a. Mi thenkhat chuan a chet dan chu amah a inpaih thlakna a nih thu leh nghak hret se, mi dang dawrin paih thlak a ni lo thei niin an sawi.
Buk a nih hmaa thu a sawiah Bayrou-a chuan politics aia an ram chanchin hlui a thlir a, MP-te chu tuna France-in suma mi dang rin an ngaih lohna an hloh chuan chhuantharten an tuar dawn tih a hrilh.
An leibat tamzia a sawi nan ‘thalaite hi salah an lut mek’ niin as awi.
Sum leh paia mi thiam tam takte pawhin France hian sumah chona lian tak tak an la hmachhawn zui dawn niin an sawi.
Bayrou-a hian Devember khan Michel Barnier a thlak a ni.