French tennis player panga ngawt an hrem

French tennis player panga ngawt an hrem
International Tennis Integrity Agency (ITIA) chuan match-fixing thubuai avangin French player pangate chu kum hnih atanga dam chung thlengin a hrem.
Yannick Thivant, Thomas Brechemier, Gabriel Petit, Thomas Setodji leh Hugo Daubias-te chu Belgium rama match-fixing tihnaah an inhnamhnawih tih nemngheh a ni a, ITIA thuchhuah chuan ITIA leh Belgian ram thuneitute nen tangrualin he match-fixing thubuaia an khaipa ber Grigor Sargsyan chu kum nga chhung lung ina khung a nih thu an tarlang tel.
Tarlan tawh angin, French player pangate chunga hremna tla pawh hi a inang lo zung a; kum 38 mi Thivant chu kum 2017 leh 2018 chhung khan match 22 result tihdanglamna kawngah a inhnamhnawih a, a chunga hremna pawh a na hle a, dam chhung atana hnawhchhuah a nih mai piahlamah US dollar 75,000 chawitir a ni a, a tihsual avanga bothlau hmuhletna leh hloh tawhte pekletlehna (restitution) atan euro 37,400 (USD 41,083.90) chawi tura tih a ni bawk.
Kum 2017-a match thum result tihdanglamnaa tel, kum 2018-a match-fixing a thum bawk avangin kum 29 mi Setodji chu kum 10 atan phuar niin, USD 20,000 chawitir a ni a, restitution-ah euro 5,500 (USD 6,041.75) chawitir a ni bawk.
Kum 2017 leh 2018 chhunga match 11 result siamdanglamnaa a inhnamhnawih avangin Brechemier chu kum sarih leh thlaru atan hnawhchhuah a nih bakah USD 40,000 chawitir niin, USD 27,500 chu a hnuah an hnuhkirsak thung.
ITIA lamin an puhna a chhanlet loh avangin Petit chu kum ruk leh tlaruk atan ‘suspend’ a ni a, USD 35,000 chawitir niin, Daubias chu kum hnih atana hrem a nih bakah USD 15,000 chawi tura hrem a ni.
An panga zinga ATP ranking nei sang ber Brechemier chuan a tawn san ber hun laiin singles ranking-ah No. 399 a hawlh pha ve.
International Tennis Integrity Agency he’ng mi pangate hi hrem an nih chhung atan ITIA member ram leh national association hnuai tawh phawta tennis inelna hmachhawn bakah tennis thiltihkhawma tel leh coaching lama inhman a khap.