Fulham-ah Raul Jemenez

Fulham-ah
Raul Jemenez
Premier League club Fulham chuan EPL-a an elpui Wolves atangin striker Raul Jemenez an la lut a, kum hnih daih contract an ziahpui.
Fulham hian kum 32 mi Jemenez manah £5m an seng. An player pawimawh Aleksan-dar Mitrovic-a’n Saudi Pro League club Al-Hilal zawm a chak vanga kawhmawh a bawl mek vangin Fulham hian Jemenez an la chuk chuk. Serbia forward Aleksandar Mitrovic hi Al-Hilal hian £25m a lak tumin an dawr a, Fulham in an hnar phawt thung. Club lamin hnar bawk mah se Mitrovic hian hlawh tam zawk a hlawh theihna turin Al-Hilal hi zawm ngei a duh ve tlat thung a, Fulham tan a khelh nawn tawh lo tur thu a sawi hial. Hetiang tehnuaih a nih vang hian forward thar lak tur an dap vat a, Jemenez an la lut zui ta a ni.
Mexican forward Jemenez hian Wolves-ah kum nga ngawt hun a hman chhunin inelna hrang hrangah vawi 166 a khel a, goal 57 a thun tawh. Wolves hin an player manto ber ni tura an lak luh hian goal a thun thei tan viau a, EPL-ah a tlangnel hman viau. EPL-ah vawi 86 a khelh atangin goal 34 lai a thun hman. Forward hawt tak a nih laiin kum 2020 khan Arsenal defender David Luiz nen an intihpalhna lamah hliam a tuar. Hliamin a tihbuai hnuin ngai a awh zo tawh lova, EPL a khelh hnuhnung vawi 49-ah goal ruk bak a thun thei tawh lo. Season liam ta khan Caraboa Cup-ah goal thum chauh a thun bawk.
Fulham lamah chona thar a hmachhawn tur chu Jeminez hian phurawm a tih thu a sawi. Season liam taah 10-na ni phak Fulham tan hian player tangkai a nih theih ngei a beisei thu a sawi tel bawk.