Fulham lakah Liverpool an tlawm, Arsenal an lawm

Pathianni zana English Premier League khelhah table a hmahruaitu Liverpool chu Fulham hneh lovin an tlawm. Fulham lakah an tlawm vangin Liverpool in hma hruai fal leh zual theihna hun tha an hloh. Inkhel dangah Chelsea leh Manchester City an chak zo lo ve bawk.
Inrinni zanah pahnihnaa awm mek Arsenal an chak zo lo. Arsenal an chak zawh loh vangin Liverpool in Fulham an hneh a nih chuan point 14 ngawtin hma an hruai fal thei dawn a, champion an hnaih leh zual sauh dawn. Craven Cottage ah chak ngei tuma lenglut Liverpool hi rin loh takin an tlawm a, Arsenal nen an inkar a zim phah ta zawk. Arsenal lawmna turin Fulham hian Liverpool an chelh a, tlawn nei lova khelh 26 zet an kal tluang lai an tihtawpsak.
Liverpool hian Fulham lakah bul an tan tha a, goal pawh an thun hma hle. Inkhel tan atanga minute 14 na lekah Alexis McAllister chuan hmahruaina goal a thun nghal. Hma takah goal an thun vangin phur mah se an phur rei lova, chawlhlawk hmain hnufual zawkah an tang hman. Fulham tan hian Ryan Sessegnon chuan goal thunin an si phurh a sut. He goal hian mualneitu team a fuih phur tha hle.
An si phurh an sut hnuin Fulham an khel tha zui viau a, goal hnih an thun belh leh thuai. Minute 32 na lekah Alex Iwobi chuan Liverpool laka hma an hruai letna goal a thun a. Liverpool talbuai laiin Rodrigo Muniz chuan minute 37 naa an goal thumna a thun zui leh zat a, 3-1 ngawta hmahruai chungin chawlhlawk an hmang.
Chawlhlawk hnu lamah Liverpool in chak let ngei tumin thapui an thawh nasa hle. An si phurh sut tumin theih tawp an chhuah a, inkhel hmuhnawm an lantir. Hun tawp dawn hnaih lam minute 72 naah Luis Diaz chuan goal thunin an si phurh a sut then. Luis Diaz goal hian Reds fuih phur viau mah se Fulham si nghak Berd Leno an paltlang thei tawh lova, Fulham lakah hreh takin an tlawm zui ta a. Khelh 26 chhung zet tlawm nei lova an kaltluanna chu Fulham in an tihtawpsak fel ta a ni.
Fulham lakah chak lo mah se Liverpool hian khelh sarih chauh khelh hmabak an nei tawh chungin point 11 in hma an la hruai a. An dinhmun la tha viau mah se, tunhnaia inelna hrang hrangah an chet that loh vangin hlauhthawnna lian tak an nei lo thei lo thung.
Pathianni zana inkhel dangah palinaa awm mek Chelsea an chak zo lo va, Brentford nen goal awm lovin an inhnehtawk. Chelsea hian Nottingham Forrest hnaih sawt mah se, an duh ang takin an inkar an tizim thei bik lo thung.
Pathianni zana inkhel dang, Manchester derby ah chak zawk an awm lo va, Old Trafford ah Manchester United leh Manchester City te goal awm lovin an inhnehtawk.
Kar tawpa EPL khelhah top 4 huanga awm team tumah chak an awm lo.